Ministru Asuntu Parlamentár no Komunikasaun Sosiál (MAPKS), Francisco Jerónimo hateten, governu liuhusi Ministériu Solidariedade Sosiál no Inkluzaun (MSSI) no Ministériu Administrasaun Estatál (MAE) simu ona reklamasaun husi komunidade ne’ebé seidauk simu subsídiu Covid-19 hamutuk rihun ida-resin.
“Ha’u la fiksa nia númeriu maibé lista reklamante sira nian rihun ida ba leten, maibé reklamasaun sira ne’e sei rezolve hotu,” dehan nia, ba jornalista sira, iha Parlamentu Nasionál (PN), Segunda (29/6).
Númeru reklamadu hirak ne'e depois halo verifikasaun hotu governu sei halo pagamentu mezmu Estadu Emerjénsia remata ona, tanba ne'e direitu sira nian.
Entretantu ba familia uma ka’in sira ne’ebé balun simu subsídiu dala-rua governu sei buka tuir.
"Ba familia sira ne’ebé simu dobru ka nia naran sai iha fatin ida, depois ba simu tan iha fatin seluk, ne’e fila-fali ba sira-nia konxiénsia. Maibé governu sei buka tuir hodi halo investigasaun,” dehan Jerónimo.
Kona-ba medida ba ema hirak ne'e governu seidauk desida iha tempu agora, maibé bainhira pagamentu ba uma-ka’in sira mak hotu ona mak foin governu deside.