"Iha ita-nia nasaun moras laiha, maibé ita-nia viziñu moras iha. Entaun se ita-nia viziñu iha, médida ne'ebé ita tenke halo mak oinsa kontinua kontrola nafatin fronteira, ema sira ne'ebé mai, naturalmente tenke kumpri nafatin regras ne'ebé MS estabelese ona hanesan kuarentena no seluk tan," dehan PM Taur ba jornalista sira liuhusi pers konferénsia ne'ebé hala'o iha Sentru Konvensoens Dili (CCD), Tersa (30/06)
Nasaun barak maka sofre Pandemia Covid 19 no rihun maka mate maibe iha nasaun ne'e ema ne'ebe deteta sofre Covid 19 la to'o ema na'in tolu nolu. Xefe governu mós dehan, kualker ema bele tama iha Timor Leste, maibé tenke tuir regras.
"Autorizasaun ba ema atu tama iha ita-nia rai, ita autoriza iha estadu emerjénsia faze datolu nian. Tanba ne'e ita autoriza funsionáriu estadu unidus nian, embaixada sira-nian, emprezáriu sira ne'ebé tau matan ba projeitu sira, bele tama no ba oin ita sei husik ema tama, maibé tenke tuir regras, hanesan sira tenke hatudu sira-nia atestadu médiku, mai iha ita-nia rai tenke halo teste ba sira, ita tau sira iha karantina no auto karantina," dehan PM
Alende ne'e, kona-ba aeroportu, governu loke, maibé seidauk iha aviaun ida mak mai, tanba nasaun sira ne'ebé nia aviaun halo movimentasaun mai iha Timor Leste seidauk deside, maibé sira ne'ebé mai ita fasilita, maibé tenke tuir regras MS nian.