Diretór Ezekutivu SNC Hugo Maria Fernandes hatete, foin lalais MJ haruka karta ba SNC hodi husu sira-nia pozisaun ba esbosu lei difamasaun.
Hafoin simu karta husi MJ, nia dehan, nia parte halo diskusaun no rekomenda ba MJ atu di’ak liu labele kriminaliza difamasaun.
"Altura ne'ebá ami mós halo duni rekomendasaun ba MJ katak labele kriminaliza difamasaun no di'ak liu ita avansa ho kodigu sivil," informa Hugo hafoin enkontru ho ministru asuntu Parlamentar no Komunikasaun Sosial Francisco Jeronimo iha palasiu governu, Sesta (03/07).
Nia dehan sei la analiza ba artigu sira iha esbosu lei ne'e maibe inportante lei ne'e tenke ho kodigu sivil.
Iha fatin hanesan, Deputadu bankada Partidu Libertasaun Popular (PLP) Abel Pires deklara nia parte konkorda ho deklarasaun Primieru Ministru Taur Matan Ruak nia.
"Kona-ba desizaun ne'e, primeiru ministru Taur Matan Ruak mak deklara ona katak ‘ita tenke husik publiku halo deskusaun no hato'o nia opiniaun mak ita hare,” nia hatete.