PM Taur kestiona ida ne’e relasiona ho karreta no motor ne’ebé polisia tranzitu prende no butuk de’it iha sira-nia edifisiu.
"Ko'alia kona-ba kestaun Finansas publika osan no impostu ne'ebé ita presiza kobra tenke kobra, horibainhira ha’u ko'alia ho Vise Ministru Interior António Armindo, ha’u dehan ‘ita presiza osan maibé, ita kuandu halo lei ba prende motor lori ba hada butuk iha eskudra polisia nian to'o ferujen no dodok hotu’," dehan PM Taur bainhira partisipa iha enkontru preparasaun loron nasional Funsaun Publika ba dala neen, iha edifísiu Ministériu Finansas, Aitarak-Laran, Sesta (03/07).
“Se ha’u polisia iha motor ba foti tan motor halo saida? halo lei par hetan osan, ohin ha’u hetan motor kontar regras husu multa, la presiza foti motor, loron seluk ha’u hetan fali foti tan osan, duke ita foti motor hanesan iha ona proplema ba kria tan problema ida, ita haree intelijensia par halo ida ne'e susar.”
PM mos dehan, iha parte alfandega dala-barak prende motor depois sunu hotu, ida sei defisil atu hatama osan ba kofre estadu.
"Ita-nia alfandega mós hanesan, prende tiha, ba sunu hotu, nusa la halo leilaun par hetan osan uitoan duke ba sunu, nasaun sira seluk hanesan ne'e sei bele uza, ita nian ba sunu, halo an hanesan ema riku, ida ne'e mak problema sira ne'ebé ita hasoru," Taur hatete.
Ho problema hirak ne'e, PM Taur dehan, ba oin presiza serbisu hamutuk hodi hadi'a atu bele fasilita di’ak liu tan dezenvolvimentu.