CNRT Duun Alkatiri Lohi PM Taur Atu Lori Todan

Ro Haksolok iha momentu inaugurasaun iha Portugal Ro Haksolok iha momentu inaugurasaun iha Portugal Foto ZEESM

Tempotimor (Dili) - Bankada Partidu Congresso Nacional Reconstrução Timor-Leste (CNRT) duun Sekretáriu Jerál Partidu FRETILIN, Marí Alkatiri, buka lohi Primeiru Ministru (PM), Taur Matan Ruak, atu simu todan kona-ba kazu Ró Haksolok.

Deputadu Bankada CNRT, Patrocino Fernandes hatete, durante tempu ne’ebé Mari Alkatiri sai hanesan Prezidente RAEOA-ZEESM, deside programa atu sosa Ró Haksolok ne’ebé selu ona ho osan liu ona tokon US$ 20 maibé to’o agora seidauk mai Timor-Leste.

"Mari Alkatiri buka lohi Primeiru-Ministru, Taur Matan Ruak, atu simu tiha todan ne’e hodi fó tan tokon US$ 14 ba Luis Pité ho nia kroni sira, hodi kontinua bosok katak hadi'a Ró Haksolok, ne’ebé tinta mós monu hotu ona no ekipamentu sira afinal aat hotu ona," alega nia, iha Plenária Parlamentu Nasionál, Segunda (6/7).

Deputadu ne'e hatutan, kestaun seluk mak kona-ba auditoria husi Câmara Contas iha RAEOA ba tinan 2014-2015 hatudu Estadu hetan prejuízu to’o tokon US$30 no iha indísiu ba krime iha ezekusaun orsamentál liu tokon US$ 300.

Nune'e, faktu akontese durante tempu ne’ebé Mari Alkatiri sai hanesan Prezidente RAEOA-ZEESM mosu irregularidade no korrupsaun.

Nia mos kestiona, ho iregularidade ne'e Alkatiri lohi tan Dom Carlos Filipe Ximenes Belo no Madre Guilhermina Marçal hodi fó bensaun no sai madrinha ba besi mamuk ida.

 

Molok ne'e, eis Prezidente Rejiaun Admistrativa Espesiál Oé-Cusse Ambeno (RAEOA) no Zona Espesiál Ekonomia Sosiál Merkadu (ZEESM), José Luís Guterres ‘Lugu’, informa tempu ida agora hanesan ikus ba Governu Timor-Leste hodi hato’o resposta ba Tribunál Coimbra. (*)

Rate this item
(0 votes)
Last modified on Monday, 06 July 2020 16:46
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.