Hanesan ezemplu ne’ebé akontese foin lalais ne’e mak dadus uma-kain. Governu ho ansi halo pagamentu subsidiu $100 ba kada uma-kain ho dadus ne’ebé ladun akuradu. Mosu mós manipulasaun dadus uma-kain.

Ministru Administrasaun Estatal, Miguel Pereira de Carvalho rekonese katak mosu duni problema balun kona-ba dadus uma-kain ne’ebé simu subsidiu $100.

“Ha'u rona husi MSSI katak uma-ka'in liu rihun 700 mak hato'o reklamasaun, no husi MAE, depois ha'u tama la to'o semana ida, ha'u rasik identifika benefisiáriu liu 1.600 mak husi aldeia sia mak pratikamente laiha,” dehan Miguel.

Tuir nia, ida ne’e hatudu faktu ida katak, dadus iha administrasaun suku sira la parepara ho didi'ak hodi fornese mai iha nasionál.

Tan ne’e, iha ninia mandatu,Miguel dehan, nia sei esfosru atu halo mudansa nune’e bele hetan dadus ne’ebé loloos.

Miguel dehan, MAE tenke halo revizaun ba diploma ministeriál nú. 47/2017 ne'ebé mak regularmente atu rejista ba fixa familia.

Revizaun ne’e, nia hatutan, atu bele identifika ho loloos uma-kain ne’ebé iha duni direitu hetan fixa familia.

“Hanesan foin dadauk ne'e ita haree dadus katak, ema hotu-hotu hetan fixa familia, dala-ruma iha familia ida nia laran, na'in 2 lae 3 mak hetan, entaun tenke hadi'a enkuadramentu legál ne'e par atu difine kritéria par hetan fixa familia.”

Aleinde ne’e, Ministru ne’e mós planeia atu halo dijitalizasaun ba dadus to’o iha nivel suku. Ba faze dahuluk sei implementa ba suku sira iha villa.

“Ha'u-nia hanoin, planu, par fasilita administrasaun suku sira, fazeadamente ho ekipamentu ne'ebé mak bele ajuda sira par dizitaliza informasaun sira,” dehan nia.

Atu hatene di’ak liu tan hanoin husi Ministru Administrasaun Estatal, Miguel Pereira de Carvalho (MPC), www.tempotimor.com (tt.com) oferese intervista esklusivu ne’ebé hala’o iha nia knar-fatin, foin lalais.

 

tt.com: Senor Ministru, foin lalais ne’e mosu problema uitoan kona-ba dadus uma-kain ne’ebé asesu ba subsidiu $100. Iha ita-boot nia mandatu saida mak ita-boot sei halo ba ida ne’e?

MPC: Ha'u rekoñese katak foin dadaun ne'e mosu duni problema, levantamentu dadus kona-ba fixa familia iha nivél aldeia no suku, ne'ebé iha ikus-ikus ne'e ha'u rona husi MSSI katak uma-ka'in liu rihun 700 mak hato'o reklamasaun, no husi MAE, depois ha'u tama la to'o semana ida, ha'u rasik identifika benefisiáriu liu 1.600 husi aldeia sia mak pratikamente laiha. Entaun ida ne'e atu aponta ba faktu ida katak, dadus iha administrasaun suku sira la parepara ho didi'ak par fornese mai iha nasionál hodi fó efeitu pagamentu apoiu umanitáriu.

Ha’u hanoin katak MAE tenke halo revizaun ba diploma ministeriál nú. 47/2017 ne'ebé mak regularmente atu rejista ba fixa familia. Tanba agora dadauk ne'e, la hatete see mak elizivél par atu bele hetan fixa familia. Hanesan foin dadauk ne'e ita haree dadus katak, ema hotu-hotu hetan fixa familia, dala-ruma iha familia ida nia laran, na'in 2 lae 3 mak hetan, entaun tenke hadi'a enkuadramentu legál ne'e par atu difine kritéria hetan fixa familia.

Saida mak ha'u atu halo mak atu garante katak, bainhira regra ne'e aprova, ita hadi'a livru suku sira nian, par autoriedade lokál hanesan xefe auku no xefe aldeia sira rejista regular, mensalmente ka anualmente, familia sira ne'ebé elizivél tuir revizaun dekretu ministerial, nune'e bele iha dadus ida ne'ebé loloos.

Ha'u tenke serbisu hamutuk fali ho estrutura hotu iha munisipiu no postu par atualiza dadus sira ne'e. Atu nune'e bele define ho loloos, see-see mak elizivél par hetan fixa familia ne'e. Ba futuru mak governu presiza fixa familia par halo pagamentu, ita bele uza dadus sira ne'e ho loloos.

Aleinde ne'e, ha'u mós hanoin katak, impprtante teb-tebes par halo dizitalizasaun informasaun sira ne'e. Ha'u hanoin dizitaliza to'o iha suku, bele mós ita hahú husi postu administrativu par informasaun sira husi suku no nivél postu administrativu sira mak tuun hodi halo dizitalizasaun, mais suku sira ne'ebé mak iha vila, ne'ebé apoiu ba administrasaun nian bele iha kapasidade par ba dizitaliza informasaun sira, par ita bele fó fasilidade to'o iha suku.

Ha'u-nia hanoin planu par fasilita administrasaun suku sira fazeadamentu ho ekipamentu ne'ebé mak bele ajuda sira par dizitaliza informasaun sira.

Ha'u espera, iha revizaun ba enkuadramentu legál no mós fasilidade ba dizitalizasaun, konserteza atividade formasaun sira, bele garante no sai dadus ne'ebé loos, par labele mosu tan problema hanesan foin dadauk ne'e.

 

tt.com: Senor Ministru, kona-ba dijitalizasaun dadus ne’e ba de’it dadus uma-kain ka ba mós dadus sira seluk?

MPC: Dijitalizasaun ne’e la'ós halo par efeitus ba fixa familia de'it, lae, maibé ha'u hanoin sei halo serbisu hamutuk ho Diresaun Jerál Estatístika (DJE), tanba DJE kada tinan 10 mak halo levantamentu dadus, mais ha'u hanoin dadus balun sira la presiza ba halo levantamentu kada tina 10, maibé anualmente sira bele hetan dadus ne'e, entaun ha'u espera, esforau ne'e, kolaborasaun ho DJE, par bele hetan informasaun sira ne'e hodi bele uzu interna ministeriu ne'e no mós bele uza ba DJE.

 

tt.com: Ikus liu, nu’udar ministru foun, iha mensajen balun ne’ebé ita-boot hakarak hato’o ba ita-nia povu?

MPC: Ha'u-nia mensajen ba publiku mak ne'e, governu nia serbisu mak sai servidór ba povu, entaun importante tebtebes mákina administrasaun estatal husi nasionál to'o suku sira bele hala'o sira-nia knaar ho didi'ak, par depois rezultadu povu bele sente katak iha diferensa no benefísiu ba sira. Espera katak serbisu hamutuk ho administrasaun munispiu no postu sira sei kontribui no hala'o esforsu hotu par bele kontribui ba ita-nia rai doben Timor-Leste.

 

tt.com: Obrigadu senor Ministru. Bom Trabalho !