Depuada Olinda Guteres hatete, keixa ida ne'e entrega ona ba ninia advogadu privadu hodi hato'o ba MP.
"Ohin ha’u ho ha’u-nia bankada prepara tiha ona keixa no fó tiha ona ba ha’u-nia advogadu no ohin aprezenta ona ba Ministériu Publiku par atu prosesa deputada Fernanda ne'ebé momentu halo asaun hasoru ha’u iha plenaria,” informa deputada Olinda iha Parlamentu Nasional, Kuarta (08/07).
Olinda dehan, nia hato’o keixa ba MP tanba la simu deputada Fernanda Lay ne’ebé ezije atu nia husu deskulpa.
Olinda dehan, nia sei la husu deskulpa ba deputada Fernanda maibé hein de’it desizaun tribunal.
“Kuandu tribunal deside dehan ha’u mak sala, ha’u foin husu deskulpa ba deputada Fernanda,” dehan nia.
Hatan ba kestaun ne'e deputada bankada CNRT Fernanda Lay deklara, nia parte prontu hein bainhira simu notifikasaun hodi hataan kona-ba kazu ida ne'e.