"Ne'e sira-nia direitu hodi halo protestu, tanba sira mós hanesan traballadór baibain, sira iha direitu hodi protesta, tanba ne'e Ministériu Saúde nia hakarak maka karta formál mai," dehan nia, iha Palásiu Governu, Kuarta (8/7).
Nia mós dehan, lista ne'ebé iha la'ós Ministeriu Saúde mak halo.
"Lista ne'ebé ami simu ne'e la'ós Ministeriu Saúde maka prepara, maibé mai husi sira-nia diretór," tenik Odete.
Tanba ne'e, nia dehan, karik sira balun mak naran laiha ka loron menus bele halo karta depois halo justifikasaun para halo pagamentu.
Entretantu, MS mós akresenta, subsídiu renumeratóriu ba pesoál saúde front line, depende ba lista prezensa.
"Tuir rezolusaun númeru 13/2020 ne'ebé aprova iha Konsellu Ministru (KM) ba Ministériu Saúde ne'e depende ba lista prezensa. Ezemplu, se ha'u nia lista prezensa iha, ha'u-nia direitu mak ne'e, la'ós pakote hanesan PNTL no F-FDTL," nia dehan.
Nia mós husu ba pesoál saúde atu halo karta formal, tanba hanesan traballadór ne'ebé profisionál presiza liuhusi karta, la'ós halo protestu iha média sosial. (*)