Deputadu Joaquim hatete, foin lalais Parlamentu Nasional hala'o ona aprovasaun ba proposta ne'ebé inisia husi governu, atu halo rekuperasaun ekonomika liu-husi susbsidiu 60% ba kompaña privadu sira iha Timor-Leste.
"Governu iha politika rasik no haruka pedidu mai Parlamentu aprova tiha ona, ho politika ida mak atu halo rekuperasaun ba ekomia iha rai laran liu husi fó subsidiu porsentu 60 ba kompaña privadu, entaun governu tenke responsabiliza," dehan Deputadu Joaquim iha Parlamentu Nasional, Sesta (10/07).
Nia hatutan, oras ne'e dadaun kompana privadu sira hein hela subsidiu 60% husi governu, tanba ne'e resposabilidade governu nian, ne'e duni tenke haree ona asuntu idanne'e atu bele realiza.
Tuir Joaquim, karik governu la realiza entaun tenke fó argumentu ruma kona-ba ida ne'e, tanba agora dadaun estadu emerjensia hotu ona maibé governu seidauk fo subsidiu ba empreza privadu sira.
"Razaun atu labele kumpre ne'e tanba sa? Sira fundamenta proposta no agora PN aprova hotu ona osan ba ida ne'e, dadus ba ida ne'e mak seiduak halo ka oinsa? Se hanesan ne'e entaun bele atraza maibé tenke kumpre, tanba ne'e desizaun politika husi PN no prevee ona osan," dehan nia.
Iha fatin hanesan prezidente bankada CNRT Duarte Nunes afirma, PN aprova ona osan b asuntu ida ne'e, tan ne'e governu tenke ezukuta.
"Tuir kultura malae sira nian, kuandu ita promete ne'e dehan ita deve, i kuandu ita deve ona tenke selu, entaun tenke selu tanba ita iha osan," dehan nia.