Print this page

Deputadu FRETILIN husu: Tinan 10 Ukun, Imi Halo Ona Saida, CNRT?

Deputada Bankada FRETILIN Maria Angelica Rangel ko'alia hela ho jornalista sira iha Paralemntu Nasional Deputada Bankada FRETILIN Maria Angelica Rangel ko'alia hela ho jornalista sira iha Paralemntu Nasional Foto File

Tempotimor-Deputadu husi bankada FRETILIN husu ba deputadu CNRT kona-ba saida mak CNRT konsege halo ona bainhira kaer ukun durante tinan 10 nia laran.

Pergunta ne’e mosu tanba deputadu FRETILIN lamenta ho asaun deputadu CNRT sira ne’ebé kontinua ameasa no konsidera governu konstitusional daualu ne’ebé lidera husi Primeiru Ministru Taur Matan Ruak laiha kapasidade hodi atende povu.

Deputada Bankada FRETILIN Maria Angelica Rangel husu ba deputada CNRT atu lalika politiza faktu, no lalika hakfodak hodi kestiona atendimentu governu.

Tanba, tuir nia, durante  governasaun ne'ebé lidera husi CNRT iha tinan 10 liu ba kotuk, la halo buat di’ak ba povu.

“Se karik uluk CNRT lidera governu fó duni buat di’ak ba povu, entaun ohin loron povu mós sei la ezije tan dezenvolvimetu,” dehan nia iha Parlamentu Nasionál, Segunda (13/07).

Tan ne’e, nia hatutan, bainhira koalia kona-ba kapasidade governu, di’ak liu lalika kestiona hela de’it hodi hatete governu konstitusiona daualu nu’udar governu de faktu no laiha kapasidade.

“Ha’u hanoin deputada CNRT ida koalia barak ne'e haree took ba imi nia ukun, governasuan durante tinan 10 nia laran imi halo saida ona ba povu ne'e mak ohin loron ita-boot sira foin hakfodak, mai ezije no kestiona governu de faktu no laiha kapasidade," dehan nia.

Nia mós la konkorda bainhira deputadu CNRT sira kompara fali governu daualu ne’ebé foin ukun tinan rua ho governu CNRT ne’ebé ukun ona tinan 10.

Hatan ba kestaun ne'e, deputada bankada CNRT Veneranda Lemos dehan, CNRT iha diretu koalia buat ne'ebé loos, tanba governu daualu laiha duni kapasidade.

Kona-ba rezultadu ukun, Feneranda dehan, CNRT iha nia ukun konsege halo ona estrada husi Dili ba Baukau no husi Dili ba Suai.

Rate this item
(3 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items