Tuir Deputadu Antonino Bianco, governu sempre ko'alia kona-ba Indústria, maibé la trasforma ba ai-han ne'ebé populasaun sira kria hanesan batar no hare.

"Governu ko'alia kona-ba Indústria karik presiza haree oinsá mak transforma batar ba ai-han seluk, entaun inisia kooperativa oinsá maka bele rekolla povu-nia produtu aleinde CLN (Sentru Lojistika Nasionál)", dehan nia, liuhusi  intervensaun, iha Plenaria PN, Segunda (13/7).

Nia hatutan, ho kestaun sira ne'e, presiza liña koordenasaun entre ministeriál sira tenke di'ak para depois populasaun-nia batar no hare labele estragu.

"Koordenassun entre ministériu sira tenke di'ak se lae ami tun ba povu halerik dehan katak batar ne'e barak fuhuk no estraga de'it", dehan Deputadu Antonino.

Aleinde, nia mos husu minsteríu saúde presiza haree no transforma povu-nia produtu ne'ebé produtivu.

"Ita-nia ai-han sira ne'e bele iha nutrisaun ne'ebé di'ak kompara ho foos husi nasaun li'ur mai Timor-Leste," dehan nia.

Hataan ba preokupasaun ne'e, Ministru Asuntu Parlamentár no Komunikasaun Sosiál, Francisco Jerónimo hateten, nia parte sei lori kestaun sira ne'ebé deputadu sira levanta ba iha ministériu relevante.

"Ha'u aponta hela depois sei hato'o ba iha ministeriu relevante hodi responde kestaun sira ne'e, no bele mós ita-boot sira hato'o karta direta ba iha parte kompetente", dehan Ministru.