Ministru dehan, kestaun kona-ba pagamentu ba profesór kontratadu sira antes ne'e iha ona esplikasaun, maibé deputadu sira repete fali kestaun ne'e, entaun MAPKomS halo tan esplikasaun ba dala rua iha PN.

"Orsamentu Dotasaun Temporaria (DOT) la prevé ida ne'e, anaunser ba fulan-Setembru kuandu Orsamentu Jerál Estadu (OJE) aprova iha Parlamentu Nasionál mak foin halo pagamentu"", dehan nia, iha plenária Parlamentu Nasionál, horisehik.

Nia esplika, direitu ba profesór kontratadu sira la'o nafatin, maibé labele simu iha tempu agora tanba governu la'o hela ho DOT ne'ebé la prevé sira-nia osan.

Maski nune'e, bainhira OJE la'o normál ona maka sei retroativa sira-nia direitu ne'ebé sei pendente hela.

"Ha'u atu hatete de'it kontratadu hanesan ne'e kada fulan ita selu maibé, tanba orsamentu ita uza Dotasaun orsamentu temporaria (DOT) entaun labele prevé no sira tenke hein fali orsamentu Jerál Estadu (OJE) ba tinan 2020 aprova iha Parlamentu Nasionál fulan-Setembru hafoin bele aloka fila-fali", tenik Jerónimo.  

Entretantu, Depetadu Bankada CNRT, Gabriel Soares husu ba governu atu tau atensaun ba profesór kontratadu sira ne'ebé seidauk simu saláriu dezde fulan-Janeiru tinan 2020 até agora.

"Ami sujere ba Ministériu Edukasaun kona-ba profesor kontratadu hotu no iha hau-nia Munisipiu Manatutu akontese sira-nia saláriu ba fulan-Janeiru tinan 2020 laiha to'o adata," tenik nia. (*)