Seidauk iha Evidénsia Superiór PNTL Jura Ba KHUNTO

Primeiru Ministru no Ministru Interior, Taur Matan Ruak akompana husi Vise Ministru Interior, Antonio Armindo halo enkontru ho kuadru superior PNTL nian iha kuartel PNTL Kaikoli iha semana kotuk Primeiru Ministru no Ministru Interior, Taur Matan Ruak akompana husi Vise Ministru Interior, Antonio Armindo halo enkontru ho kuadru superior PNTL nian iha kuartel PNTL Kaikoli iha semana kotuk Foto Midia PM

Tempotimor (Dili) - Relasiona ho informasaun ne'ebé espekula hela iha públiku deskonfia iha superiór balun husi Instituisaun Polísia Nasionál Timor Leste (PNTL) ne'ebé halo juramentu ba Partidu Kmanek Haburas Unidade Nasionál Timor Oan (KHUNTO), maibé to'o oras ne'e seidauk hatudu evidénsia ruma.


"PNTL sira iha regulamentu dixiplinár rasik. To'o agora ema temi katak ema ba juramentu, maibé laiha evidénsia," dehan Primeiru Ministru nu'udar mós Ministru Interiór, Taur Matan Ruak, ba jornalista sira, iha Palásiu Prezidensiál, Bairru-Pité, Kinta (16/7).

Nia mós dehan, hanesan Ministru Interiór (MI) lakohi espekula sé-sé mak envolve.

"Temi ema, maibé ema sé ne'e, nunka hatete. Tanba ne'e, Primeiru Ministru no Ministru Interiór labele espekula, se ema ruma iha faktu, ne'e ita bele ko'alia," nia dehan.

Alende ne'e, Xefe Governu hein diverjénsia entre Igreja Katólika no Partidu KHUNTO bele iha solusaun.

"Solusaun mak ne'e, hotu-hotu buka halo buat ne'ebé di'ak, kontribui hanoin ne'ebé di'ak para labele komplika liután situasaun ita-nia rai laran," dehan nia.

Antes ne'e, mosu informasaun katak iha membru PNTL balun ne'ebé partisipa iha juramentu hodi sai militante ba Partidu KHUNTO. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.