Print this page

PNTL Hapara 'Intensaun Aat' Ángela Freitas

Komisariu PNTL ko'alia ba jornalista sira iha Palasiu Prezidensial Komisariu PNTL ko'alia ba jornalista sira iha Palasiu Prezidensial Foto File

Tempotimor (Dili) - Ángela Freitas ho nia grupu Rezisténsia Nasionál Defende Justisa no Konstituisaun RDTL ho planeia manifestasaun no uza people power hodi hatún Prezidente Repúblika, Francisco Guterres Lú Olo, husi nia kargu, maibé 'intensaun aat' ne'e falla tanba la hetan lisensa husi Polisia Nasionál Timor Leste (PNTL).


Komandante Jerál PNTL, Komisáriu Faustino da Costa hateten, Ángela Freitas ho nia grupu sei la halo demo tanba la prienxe kritériu.

Nia dehan, konstituisaun fó dalan ema hotu halo manifestasaun, maibé presiza prienxe prosedimentu sira ne'ebé iha.

"Atu halo manifestasaun tenke fó hatene ba PNTL molok loron haat ba demo. Pontu seluk, ema ne'ebé organiza ne'e na'in hira mak organiza, tenke asina karta iha PNTL," dehan Komisáriu Faustino, ba jornalista sira, iha Palásiu Prezidensiál Bairru-Pité, Kinta (16/07).

Ne'e duni, PNTL bolu ona autor inisiador ba manifestasaun ne'e hodi husu atu hapara.

"Laiha buat ida ka manifestasaun maka akontese, tanba prosedimentu ne'ebé iha sira la kumpre no sees husi lei autorizasaun ba manifestasaun ninian," nia dehan.

Lisensa ne'ebé PNTL fó maka reprezentante sira de'it maka halo petisaun hodi haruka ba Prezidente Repúblika, maibé labele iha manifestasau.
Ne'e duni, bainhira iha konsentrasaun ema barak no mosu manifestasaun maka PNTL sei kaptura responsavel, Ángela Freitas.

Tuir karta ne'ebé www.tempotimor.com asesu, abaixu asinadu husi Kooredenadór ba asaun Cornelio Barros no Porta-vós Ángela Freitas katak, sei mobiliza massa hodi halo manifestasaun hasoru Prezidente Repúblika, Francisco Guterres Lú Olo, iha loron Sesta (17/7), maibé la konsege, tanba karta rekoñesimentu ba PNTL la prienxe kritériu ka regra sira ne'ebé iha.

Antes ne'e, iha soru-mutu entre reprezentante grupu Rezisténsia Nasionál Defende Justisa no Konstituisaun RDTL, Ai-Tahan Matak ho PNTL konkorda ona katak sei la akontese buat ruma, iha Sesta (17/7), tanba la hetan lisensa husi parte seguransa. (*)

Rate this item
(3 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items