La Fó Fatin ba Arão, Prezidente PN Aniceto Viola Rejimentu

Eis Prezidente Parlamentu Nasional Arão Noé de Jesus da Costa Amaral ko'alia ba jornalista sira iha resintu Parlamentu Nasional Eis Prezidente Parlamentu Nasional Arão Noé de Jesus da Costa Amaral ko'alia ba jornalista sira iha resintu Parlamentu Nasional Foto suplai

Tempotimor (Dili)-Prezidente Parlamentu Nasionál Aniceto Guterres to’o ohin loron seidauk halo deliberasaun ba kadeira ne’ebé molok ne’e nia okupa iha komisaun B trata asuntu defeza no seguransa.

Eis Prezidente PN Arão Noe hatete, to’o ohin loron kadeira komisaun B ne’ebé molok ne’e atual Prezidente PN okupa seidauk entrega ba eis Prezidente PN.

"Durante ne'e ha’u so marka prezensa iha plenaria iha Segunda no Tersa de’it, maibé depois de Kuarta, Kinta, Sesta, ne'e ha’u deskansa, tanba laiha serbisu, ha’u-nia serbisu komisaun mós seiduak iha," dehan Arão iha plenaria PN, Kinta (16/07).

Arão dehan, iha fulan kotuk, bankada CNRT hato’o ona karta ba Prezidente PN atu aprezenta kadereira  membru komisaun B ne’ebé molok ne'e nia okupa ba plenaria hodi bele halo deliberasaun, nune’e entrega kadeira ne'e ba deputadu sira seluk, tanba Aniceto  asumi ona kargu Prezidente PN no laiha direitu ona atu okupa kadeira komisaun.

"Ha’u hanoin meza viola regras iha rejimentu parlamentu nian tanba to'o agora seidauk halo resposta ruma kona-ba (Prezidente PN) ninia kadeira hanesan membru komisaun B, ne’ebé antes ne'e nia okupa, tanba ami mós hato'o ona karta maibé Prezidente PN seidauk haree kestaun ne'e," deklara Arão.

Maske kestaun ne’e buat kiik ida no la vale, maibé Arão dehan, hanesan orgaun estadu tenke kumpre tanba lei ne'e halo atu regula ema hotu.

Iha fatin hanesan, deputadu bankada FRETILIN Joaquim dos Santos hatete,  bankada ne'ebé nia deputadu seiduak envolve iha komisaun, tenke aprezenta ba plenaria hafoin mak halo proposta atu bele halo deliberasaun ba estrutura ne'ebé molok ne'e aprova ona.

"Estrutura komisaun ne'e tuir ninia estatutu, tanba bainhira naran deputadu sira ne'ebé mak tama ona iha lista komisaun  ne'e permanente, tanba aprovadu husi plenaria, maibé se hakarak atu troka kadeira, tenke halo deliberasaun plenaria, entaun bankada sira ne'ebé seidauk envolve komisaun tenke aprezenta karta ruma ba plenaria," dehan nia.

Kona-ba viola rejimentu ka lae, nia dehan, ne'e so Prezidente PN mak bele fó klarifikasaun tanba ida ne'e liga ba ninia kompetensia.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.