Akuzasaun ida ne’e mosu husi deputadu sira iha Parlamentu Nasionál relasiona ho asaun husi lider partidu KHUNTO ne’ebé fó juramentu lemo-lemo ba sidadaun Timor-Leste hodi tama iha KHUNTO.

Iha video no imajen balun ne’ebé sirkula iha media sosial ne’ebé hatudu prosesu juramentu ema ida atu tama ba KHUNTO.

Kritika ba juramentu ne’ebé KHUNTO halo ne’e la’os mosu de’it husi deputadu sira, maibé mós husi parte igreja Katolika, ne’ebé konsidera KHUNTO nia asaun kontra Lei Kanonika.

Relasiona ho akuzasaun ba pesoal PNTL ne’ebé halo juramentu, Vise Ministru Interior Antonio Armindo ne’ebé mós nu’udar membru husi partidu KHUNTO, hatete, pesoal PNTL halo juramentu ne’e rumoris de’it.

Nia husu ba deputadu sira ne’ebé karik iha provas atu lori ba dalan legal hodi prosesa, la’os halo de’it akuzasaun hodi koko atu hafoer imajen PNTL no hamonu kredibilidade instituisaun seguransa ne’e.

Tuir Vise Ministru Interior ne’e, hanesan instituisaun estadu ne’ebé responsavel ba area orden publika no seguransa nasional, PNTL hakruk de’it ba estadu no kumpre de’it Konstituisaun RDTL.

Vise MI hatutan, bainhira hala’o nia funsaun hanesan instituisaun, membru PNTL labele halo kualker tipu afiliasaun, maibé hanesan sidadaun babain, nia iha direitu konstitusional atu ezerse nia direitu politiku liu husi votus.

“Prosedimentu ne’e hatur ho Lei. Maibé se hakarak halo kontratriu entaun tenke halo Lei hodi bandu instituisaun F-FDTL no PNTL labele vota, atu nune ita lalika duun-malu i par ona uza instituisaun governu hodi bobar malu,” dehan Vise Ministru Antonio.

Nia hatutan, labele tan issu, halo konkluzaun hodi hamonu de’it instituisaun PNTL ninia integridade, inklui dezmoraliza membru PNTL sira.

Tuir nia, instituisaun forte ida hanesan PNTL sei la konsume issu baratu atu sobu instituisaun, no laiha dalan atu hasai membru PNTL ida tan de’it rumoris.

 

Atu hatene di’ak liu tan hanoin husi Vise Ministru Interior Antonio Armindo (AA), tuir mai www.tempotimor.com (tt.com) oferese dala-lia ho vise ministru ne’e iha ninia knar-fatin, foin lalais.

tt.com: Senor Vise Ministru, oinsa ita-boot nia hanoin kona-ba akuzasaun ba pesoal PNTL halo juramentu ba KHUNTO?

AA: Ha’u konsidera buat ne’e hanesan issu de’it. Tanba issu de’it, ha’u sei la halo komentariu liu tan.

 

tt.com:  Maske issu de’it, maibé karik PNTL loke prosesu investigasaun ruma?

AA: Ha’u seidauk hatene iha ona investigasaun (ka lae), mais atu halo investigasaun ruma tenke bazeia ba faktus, laos husi lia-bobar. Maibé, se iha karik (investigasaun), entaun ita hotu hein nia rezultadu.

 

tt.com: Nu’udar instituisaun seguransa, iha regra balun ne’ebé bandu membru PNTL atu labele halo juramentu ba partidu politiku ka lae?

AA: Tuir ha’u hatene, hanesan instituisaun estadu ne’ebé responsavel ba area orden publika no seguransa nasional, PNTL hakruk de’it ba estadu no kumpre de’it mak Konstituisaun RDTL. Tuir artigu 147, deskreve klaru loos kona ba papel polisia hanesan forsa seguransa.

Bainhira halao nia funsaun hanesan instituisaun, nia labele halo kualker tipu afiliasaun, maibé hanesan sidadaun baibain, nia iha direitu konstitusional atu ezerse nia direitu politiku liu husi votus. Prosedimentus ne’e hatur ho Lei, maibé se hakarak halo kontrariu entaun tenke halo Lei hodi bandu instituisaun F-FDTL no PNTL labele vota, atu nune ita lalika duun malu i par ona ho uza instituisaun governu hodi bobar malu.

 

tt.com: Oinsa ho membru PNTL ne’ebé uluk kedan tuir grupu artemarsiais?

AA: Se uluk nia halo parte organizasaun sira ne’e, ha’u mós laiha konesimentu ba ida ne’e, tanba ne’e kestaun individual, no labele aplika iha instituisaun PNTL tanba PNTL instituisaun ida ne’ebé mak tenke mantein Lei no Orden. Maibé, se agora membru sira ne’e ativu hanesan membru PNTL, klaru ke nia priense ona rekizitus ne’ebé bandu membru PNTL atu afilia ba organizasaun artemarsiais.

 

tt.com: Oinsa ita-boot nia hanoin ba ezijensia husi deputadu sira iha PN atu investiga no hasai membru PNTL ne’ebé halo juramentu ba partidu KHUNTO?

AA: Deputadu sira bele koalia no kritika, no se iha provas karik bele prosesa tuir dalan legal, no bele mós halo lei hodi kondena aktus sira ne’e. Iha PNTL mós iha prosesu disiplinar ke bele uza hodi hadia bainhira iha naksalak ruma.

Ita hotu presiza kontribui hodi hadi’ak instituisaun PNTL hodi bele servi di’ak Timor-oan tomak, ne’e persiza ita-nia kontribuisaun pozitivu hotu, labele rona de’it issu, ita hakarak kritika maka’as de’it hodi husu atu hasai membru ruma.

Ita hotu tenke konsidera membru PNTL ninia serbisu di’ak durante ne’e, labele konta de’it ida aat, maibé konta mós sira-nia kontribuisaun di’ak sira durante ne’e, i ita apresia serbisu PNTL nian tomak durante ne’e.

Hanesan instituisaun estadu, ita mós presiza tempu atu dezenvolve, problema sira ne’ebé mak agora iha ne’e ita uza hanesan lisaun, aprende, par ita uza hodi hadi’ak instituisaun ne’e sai di’ak liu tan iha futuru.

Labele tan issu, ita halo konkluzaun hodi hamonu de’it instituisaun nia integridade, inklui dezmoraliza membru PNTL sira. Instituisaun forte ida hanesan PNTL sei la konsume issu baratu sira atu sobu instituisaun, no laiha dalan ba hasai membru ruma tan de’it rumoris. Sa tan agora foto mós ema bele edit, uza seluk nia foto ba tau fali ba seluk nian, tanba ne’e ita sei la konsume issu ne’e.

 

tt.com: Obrigadu ba ita-boot nia tempu.