Print this page

Naimori 'Bandu' Deputadu KHUNTO Provoka Igreja

Tempotimor (Dili) - Konselleiru Másimu  Partidu Kmanek Haburas Unidade Nasionál Timor-Oan (KHUNTO),  José dos Santos Naimori Bucar, orienta deputadu sira husi KHUNTO labele provoka ka krítika hasoru Igreja Katólika.


Prezidente Bankada KHUNTO, Olinda Guterres hateten, dadauk ne'e sira simu ona orientasaun husi konseleiru superior Partidu KHUNTO Naimori Bucar.

Orientasaun ne'e atu bandu deputada sira husi KHUNTO iha Parlamentu Nasionál maka hanesan Olinda Guterres, Luis Roberto, António Verdiál de Sousa, António Nobre Tilman no Deputada Irene Gonzaga Sarmento.

"Ami nia Konselleiru bandu ami labele provoka tan situsaun no labele krítika Igreja Katólika," dehan Olinda, iha PN, Sesta (17/7).

Ho orientasaun ne'e, nia mós promete sei la ko’alia tán maski ema balun hakarak levanta beibeik asuntu ne’e iha plenária.

Nia dehan, karik ko'alia kona-ba povu nia moris ne'e bele halo krítika, maibé kona-ba asuntu sira seluk kona-ba partidu nian deputadu na'in 5 sei nonook no lakohi kontra tan, tanba KHUNTO iha ona regra.

"Atu ema sukit liman ba ami, atu mai tebe tan ami mos ami fó aan de'it ona, ami mós lakohi ko'alia hodi responde, tanba orientasuan mai husi ami nian konseleiru partidu," nia deklara. (*)
 
 
 
 
 
Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items