Diretór Ezekutivu FONGTIL Daniel Santos do Carmo hatete, rezignasaun Xanana Gusmão husi kargu Xefe Negosiadór Prinsipal ba Delimitasaun Fronteira Maritima nu’udar ninia direitu.

Nia hatete, serbisu hotu-hotu ne’ebé iha relasaun ho serbisu xefe negosiadór nian mai husi planu estratejiku dezenvolvimentu nasionál (PEDN) la’os komitementu partidu ida nian.

"Rezignasaun ne'e direitu ida, maibé ita mós hatene katak, serbisu hotu ne'ebé halo ona ne'e la'ós komitmentu partidu nian, maibé ne'e husi Planu Estratéjiku Dezenvolvimentu Nasionál (PEDN) mak hatuur iha ne'ebá, entaun see-see de'it mak atu rezigna an, serbisu sira ne'e tenke kontinua, tanba ne'e mak ita-nia esperansa se señor Xanana Gusmão rezigna an, serbisu hotu bele handover ho responsabilidade, atu estadu ka governu nomeia fali ema foun hodi kontinua prosesu sira ne'e,” dehan Daniel iha nia knaar fatin, Kaikoli, Segunda (20/07).

"Ami-nia esperansa mak liu-liu husu ba governu, señor Xanana Gusmão no partidu polítiku sira iha ita-nia rai ne'e, atu labele politiza asuntu GS ida ne'e, tanba ida ne'e asuntu interese nasional, ne'ebé hakerek iha PEDN, entaun ita hotu tenke iha luta ida par lori benefisia ba ita-nia povu. Tanba ne'e lalika politiza, maibé ita koko tau sasan ne'e tuir nia dalan, par ema ruma mak ba lidera karaik hetan apoiu husi ema hotu, tanba servisu ne'e tékniku liu," nia dehan.

Kona-ba negosiasaun mina no gas, nia dehan, molok ne’e sosiedade sivíl sira eziee atu labele ansi, tanba tenke haree didi'ak rekursu umanu ne'ebé atu jere ba investimentu boot ne'ebé gasta liu tokon $20.

"Agora mós hanesan, ita keta ansi lai, tanba realidade ne'ebé ita infrenta mak folin mina iha mundu ne'e tuun, tanba pandemia Covid-19, entaun ami hanoin katak, husi tinan ida ne'e ba to'o tinan lima mai tan, ita lalika ko'alia lai kona-ba industria mina, tanba ita tenke halo estudu ida di'ak kona-ba nia implikasaun sira," Daniel dehan.