Tuir nia, Lei Orgániku VIII Governu fó kompeténsia hotu-hotu ba Ministru Obras Públika (MOP), Salvador Pires, tan ne'e hato'o kestaun ne'e hodi ba futuru bele hadi'a.
"Até adata ha'u-nia kompeténsia mak halai liu ba inspesaun auditória de'it. Diresaun hotu-hotu halai direita ba ministru", tenik Nicolau hafoin hasoru-malu ho Primeiru Ministru, Taur Matan Ruak, iha Palásiu Governu, Tersa (21/07).
Ne'e duni, hato'o ba Primeiru Ministru atu hetan kompeténsia balun iha diresaun ruma hodi servisu ministériu nian labele sentraliza de'it iha nivel ministru.
Nia hatutan, ho kestaun hirak ne'e mak nu'udár membru governu ladun satisfás entaun mai relata ba Primeiru Ministru atu bele hadi'a ba futuru hodi povu mós bele sente responsablidade ne'ebé daudaun asumi hela.
"Ita labele tuur nontong de'it maibé pelumenus ita halo buat ruma ba sidadaun no povu", tenik nia.
Nicolau dehan, kompeténsia ne'ebé iha maka identifika de'it problema sira ne'ebé durante ministériu enfrenta, liuliu kona-ba inspesaun ba diresaun hotu-hotu hanesan bee, estrada, rekursu umanu, planeamentu, ezekusaun no implementasaun. (*)