Atu revoga lei ne'e governu liuhusi Ministériu Solidariedade Sosiál Inkluzaun (MSSI) no Ministru Asuntu Parlamentár no Komunikasaun Sosiál (MAPKomS) halo ona audiénsia publika ho Komisaun A Parlamentu Nasionál, hodi aprezenta proposta alterasaun.

Hafoin remata audiénsia, Vise-MSSI, Shigni Candrawati Verdial dehan, proposta ne’e prevé atu buka dalan oinsá ajusta rejime pensaun vitalísia ba rejime seguransa sosiál, ne’ebé sei la elimina direitu ba ema ruma, liuliu ba órgaun titulár sira.

“Ami ohin mai aprezenta proposta ne’ebé antes ne'e hetan ona aprovasaun maka Rejime Jurídiku Seguransa Sosiál ba eis-titulár iha órgaun soberania sira ka alterasaun ba Lei Pensaun Vitalísia. Órgaun Soberania sira iha kondisaun igualdade, valorizadu ba karreira kontributiva titulár,” dehan Vise-Ministra, ba jornalista, iha PN, Kinta (23/7).

Nia rekoñese, ho Lei Pensaun Vitalisia ne'ebé implementa durante ne'e hatodan Orsamentu Jerál Estadu no mós halo injustisa ba povu no publiku tomak.

"Tan ne'e ami hanoin katak lei ne'e presiza muda ba fali seguransa sosiál, atu nune'e órgaun titulár haat mós bele kontribui no mós sei la fó tan benefísiu ba eis-titulár ka se de'it," tenik nia.

Iha biban ne'e, Vise Prezidente Komisaun A, Francisco Vasconcelos hatete, lei ne'e di'ak tebes no membru Parlamentu Nasionál mós konkorda no apoiu.

Tuir nia, presiza duni halo revoga ba Lei Pensaun Vitisilia tuir kompromisu sira ne'ebé governu no PN hato'o iha kampaña eleitorál.

“Ami konkorda másimu no ida ne'e la'ós inisiativa governu nian de'it, maibé ida ne'e ami mós propoin kleur ona, hakarak duni atu halakon lei ne'e hodi fó biban fali ba seguransa sosiál,” subliña nia.

Tuir nia, pensaun ne’e hanesan priviléjiu exesionál ne’ebé laiha justifikasaun ba klase polítika, enkuantu sidadaun sira sei dook husi moris di’ak no dala ruma públiku mós ezije atu halakon Lei Pensaun Vitalisia. (*)