Ministru José Agostinho da Silva hatete, MTK iha projesaun atu hetan reseita boot ba kofre estadu iha tinan 2020, maibé tanba pandemia Covid-19, MTK la konsege atinze projesaun ne’e.
"Kona-ba reseita, na'in hira haree rasik, foin lalais ita hasoru surtu Covid-19, ne'e fó mós impaktu. Entaun husi fulan Janeiru to'o Juñu 2020, MTK rekolla reseita liu tokon $13, entaun afeita, kuandu liga ba ita-nia projesaun," dehan Ministru José ba jornalista sira iha salaun MTK Kaikoli, hafoin audiénsia ho komisaun F Parlamentu Nasionál (PN), Kinta (23/07).
Maske nune’e, nia hatete mós katak, presiza mós hadi’a kondisaun bainhira hakarak rekolla reseita ne’ebé boot ba kofre estadu.
"Ba futuru ita presiza hadi'a kondisaun, rekursu umanu ne'ebé di'ak inklui tenke haree ba enkuadramentu legál ne'ebé di'ak, par haree ba kanais reseita sira ne'ebé seidauk funsiona, par bele kobre reseita ba kofre estadu," dehan Ministru ne’e.
Kona-ba fontes reseitas ba MTK, nia hatete, durante ne'e MTK rekolla husi ajensia autónomu sira ne'ebé tutela ba MTK, inklui diresaun sira iha MTK.