Deputadu sira 'trauma' tanba Parlamentu Nasional halo ona aprovasaun ba osan hodi atende ba moras surtu Covid-19 iha Timor-Leste, maibe rezultadu ezekusaun sai oin-seluk.
Deputada Bankada FRETILIN, Angélica Rangel hateten, durante primeiru ho segundu levantamentu, ba osan Surtu Covid-19 nian ne'ebé Parlamentu aprova hamutuk rihun US$.220 no hetan mós apoiu husi parseiru dezenvolvimentu sira, maibé sosa de'it ventiladór ida.
"Aprezentasaun dehan ventiladór ne'e ida de'it, ami hakfodak, tanba ami aprova osan no nee mós fo apoiu husi Xina, tanbasá mak ami aprova tiha osan mas ventiladór ne'e ida deit," dehan nia, bainhira halo interevensaun iha Plenária PN, Tersa (28-07).
Nia dehan, iha primeiru levantamentu Fundu Petróleu nian atu tau osan ba Covid-19 no Eis-Ministru Dionísio Babo mós asina akordu ida ho UNDP atu halo akizisaun ekipamentu ba ventiladór sira.
"See ha'u la sala iha dokumentu ne'ebá ne'e iha osan purvolta tokon US$ 5.9, nia prosesu andamentu ne'e to'o iha ne'ebé ona. Tanba ohin aprezenta dehan to'o agora ventiladór ne'e ida de'it ba iha kazu emerjensia ruma," tenik Angélica.
Nia husu ba Governu atu halo aprezentasaun ba deputadu sira tanba aprova osan maibé tanba sá maka kapasidade governu nian ezekuta 48% de'it.
"Kazu ida emerjénsia ita-nia lei aprovizionamentu ne'e fo dalan. Kazu emerjénsia lalika ba iha aprovizionamentu, signifika katak lei ne'e fó dalan atu halo ajudikasaun direta ba iha kompañia ne'ebé maka kompetente atu halo konstrusaun sira ne'e ho lalais", hateten nia.
Hataan ba kestaun nee, Ministra Saude, Odete Belo dehan, akordu MS ho UNDP sira hatama ona sasán barak inklui sei hatama mós ventiladór ne'ebé MS propoin ona atu sosa.
"Iha faze primeiru haruka uluk ai-moruk ba espesialista sira iha HNGV, iha faze segunda ne'ebe sira sei haruka mai maka ventiladór hamutuk lima ba iha sentru Saúde Vera Cruz, no sei hanorin mediku sira oinsá atu uza ventoladór ne'e rasik", dehan nia. (*)