Vasceoncelhos dehan, kualker ukun-nain, inklui mós membru PLP ne’ebé komete kazu ruma tenke koopera ho parte justisa.

Atual deputadu ne’e gava Ministru Salvador ne’ebé hakat ba edifisiu Ministériu Públiku (MP) hodi presta deklarasaun.

"Ha’u ladun intende didi’ak sira nia problema, maibé kazu ne'e kuandu ba ona presta deklarasaun iha Ministériu Publiku (MP) ne'e ezemplu di’ak, la presiza dehan tenke hasai imunidade," dehan Vasconcelhos ba www.tempotimor.com, iha Parlamentu Nasional, Kuarta (29/07).

Nia hatutan, kualker governante no membru PN ne’ebé iha ona kazu tenke ba presta deklarasaun iha MP no kuandu iha sala bele tama kadeia.

"Ha’u la hatene problema saida mak ministru ba presta deklarasaun, maibé kuandu nia hatene iha problema ruma, klaru katak, kulker ministru ou deputadu ba presta deklarasaun ne'e baibain de'it, lalika tan presta deklarasaun, bele ba kadeia mós, tanba Lei Anti Korupsaun (KAK) iha tiha ona," katak nia.

Deputadu PLP ne’e dehan, maske mai husi partidu politiku ida de’it, maibé kuandu iha kazu labele taka ka proteje malu no tenke kopera ho justisa.

"Lei Anti Korupsaun (KAK) iha ona, imposivel ita atu taka, ita la taka ema ida, maske sa’e karreta (ida), maibé tuun idaidak selu ninian," dehan nia.

Hatan kona-ba pozisaun PLP nian karik ikus mai Ministru Salvador sai arguidu, Vasceoncelhos dehan, PLP seidauk bele foti opsaun ka desizaun ruma tanba tribunal seidauk hasai desizaun.

"Enkuantu Tribunal seidauk deside buat ruma, ne'e inosente," dehan nia.

Maske ema ida presta ona deklarasaun iha MP, maibé, nia hatutan, labele konsidera katak ema ne'e sala ona, tanba sei iha prosesu investigasaun.

"Labele dehan katak ema ne'ebé ba ona Ministériu Publiku sai arguidu, ita konsidera ema ne'e sala ona, ne'e labele, tanba atu arguidu ou testamuña mós tenke ba. Agora deputadu sira iha ne'e mós iha ona notifikasaun husi Ministériu Publiku atu ba hanesan arguidu ou ba testamuna, tanba ne'e partisipa iha Ministériu Publiku ne'e signifika kopera ho seitor justisa."