Iha aprezentasaun naran, Bankada Governu ne'ebé kompostu husi FRETILIN, PLP no KHUNTO ida-idak hatama ninia kandidatura.
Husi Bankada FRETILIN aprezenta kandidatu Fausto Freitas da Silva “Liurai Tasi”. Entretantu Bankada KHUNTO fali aprezenta João Mestre Verdial.
Dinámika ne'ebé hatudu husi bankada parlamentár governu nian hamosu interpretasaun katak situasaun ne'e akontese entre 'kaan-teen' poder no sinal nakfera.
Ne'e duni, Bankada Governu aprezenta fali ema na'in rua hodi kompete ho bankada opozisaun UDT/FM ne'ebé aprezenta João Pereira.
Hafoin prosesu eleisaun lao, kandidatu númeru 1 João Pereira hetan votu 17, kandidatu Fausto Freitas “Liurai Tasi” hetan votu 38 no kandidatu João Mestre Verdial hetan votu 5.
“Fausto Freitas da Silva “Liurai Tasi” ne’ebé hetan votu 38 maka eleitu nu’udar membru ba Komisaun Funsaun Públika”, deklara Prezidente Parlamentu Nasionál em-ezersísiu, Maria Angelina Sarmento Lopes, iha plenária estraordinária, Parlamentu Nasionál, Kuarta (29/7).
Fausto moris iha Quelicai, Munisípiu Baukau, iha loron 7 Abríl 1963, abilitasaun literária mestradu iha jestaun rekursu umanu. Liurai Tasi antes ne’e asume kargu deputadu iha IV Lejizlatura husi Bankada FRETILIN.
Vise-Prezidente Parlamentu Nasionál, Maria Angelina hatete, mandatu membru KFP ne’e ba tinan lima (5) hahú husi 2020 to’o 2025. (*)