Tempotimor (Dili) - Xefe Estadu Maiór Forsa Armada, Koronel Calistro dos Santos Coliati, sente triste bainhira haree membru Forsa Armada Libertasaun Nasionál Timor-Leste (FALINTIL) reformadu ba vida sivíl, agora daudaun moris iha kondisaun susar ho terus nia-laran.

"Sira-nia kondisaun ohin loron ne'e bele dehan susar teb-tebes, bainhira kompara fali ema hosi instituisaun sira ne'ebé seluk, too ohin loron laiha reforma. Purtantu, ida ne'e presiza tenke iha justisa," dehan nia, ba jornalista sira, iha Kuartél Jerál FFDTL, Fatuhada, Kinta (30/07).

Nia dehan, atu halo reforma ba membru FALINTIL sira, presiza tuir lei, nune'e husu ajuda ba média sira tenke hato'o informasaun ba sosiedade timorense katak, funu na'in sira durante tempu naruk halo funu iha tinan 24 nia-laran, sira to'o mai respeita ba regras no lei, maibé kompara ho ema husi instituisaun seluk to'o agora la reforma.

"Ema funu na'in sira haruka ba uma, ema ne'ebé uluk la funu ba rai ida ne'e, kontra rai ida ne'e ita halibur hamutuk iha rai ida ne'e", nia lamenta. (*)