Deputadu Kritika Ema Sona Estudante UNPAZ iha PNTL nia "Inus Tutun"

Ema lubun haleu estudante ne'ebe hetan sona husi ema deskuinesidu iha UNPAZ Dili (3/8) Ema lubun haleu estudante ne'ebe hetan sona husi ema deskuinesidu iha UNPAZ Dili (3/8) Foto suplai

Tempotimor (Dili)-Kazu sona estudante Universidade da Pas (UNPAZ) hamosu preokupasaun balun, liu-liu tanba kazu ne'e akontese iha membru Polisia Nasional Timor-Leste (PNTL) nia "inus tutun".

Molok kazu ema deskoñesidu sona estudante UNPAZ husi Fakuldade Saude Publika, Alfredo Miranda Alves, mosu ona kazu konfrontu entre komunidade sira ne'ebé hela besik UNPAZ, hafoin joven ida mate tanba monu husi andar edifisiu UNPAZ.

Hafoin kazu ne'e, maske prosesu aprendizajen iha Universidade ne'e kontinua lao, maibé ho situasaun ne'ebé ladun seguru. Ho nune'e, Komando PNTL Dili, destaka ninia membru hodi fó seguransa atu bele antisipa situasaun ne'ebé la espera.

Maibé, iha Segunda (03/08), ema dezkoñesidu ho motor tama ba area UNPAZ hodi sona kanek estudante ida.

Reitor UNPAZ, Adolmando Amaral kestiona mós sistema seguransa membru PNTL ne'ebé destaka iha ne'ebá.

Nia dehan, parte universidade bolu ona parte PNTL ne'ebé durante ne'e destakadu iha area UNPAZ.

"Ami iha ne'e seguransa la'o, ami mós hetan apoiu husi PNTL ne'ebé mak sempre mai garante estabilidade iha ne'e. Maibé ohin akontese ne'e mak ami bolu ona parte seguransa sira, par husu sira-nia responsabilidade, tanba saida mak sira labele kaptura suspeitu," dehan nia iha UNPAZ, Segunda (03/08).

Relasiona ho ida ne'e, deputadu Bankada FRETILIN David Dias Mandati konsidera kazu krime kontinua mosu tanba polisia sira ladun koopera ho parte autoridade no ladun iha envolvimentu populasaun hodi garante seguransa.

Tuir nia, iha buat tolu ne'ebé PNTL tenke halo hodi bele prevene asaun krime.

"Ha'u uluk kedas koalia beibeik iha komisaun no ba jornalista sira katak,  ita-nia mehi atu prevene kriminozu iha rai laran ne'e, ita fó ona serbisu tolu ba PNTL sira atu bele kumpre: ida, vizibilidade. rua, envolvimentu ho seguransa entre populasaun. tolu, serbisu profisional. buta tolu mak ita kumpre ita mós iha ona kapasidade di'ak atu prevene krime,".dehan Mandati iha PN, Tersa (04/08).

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.