Tuir Eis-Prezidente Repúblika ne'e, maske vizita Eis-Primeiru Ministru, Kay Rala Xanana Gusmão nian, iha munisípiu sira, halo kampaña la kontra Governu, maibé ida ne'e polítika, tanba partidu CNRT mak iha kotuk, hodi organiza profisionalmente ho rekursu.
"Maun Xanana kuandu ba halo obra karidade ne'e ba ema rihun ba rihun, ha'u fiar tanba CNRT husi kotuk, mak organiza profisionalmente ho rekursu", dehan Laureadu Novel da Paz, José Ramos Horta, iha nia rezidénsia Metiaut, kinta (06/08).
"Ema hasoru maun Xanana rihun ba rihun, ha'u hakfodak, mesmu iha Atauro kuaze ema nunka halo atividade polítika, iha ne'ebá, maibé ema lubuk ida kuaze populasaun tomak Atauro ba haree nia ne'e, polítika ona",
"Karidade maibé ne'e polítika, maske maun Xanana halo vizita ne'e, uza kampaña la kontra Governu, la temi Governu nia naran",
Eis-Ministru Negósiu Estranjeiru no Kooperasaun ne'e akresenta, antes ne'e, iha fulan hirak liu ba, nia hetan konvite hodi halo konferénsia internasionál, maibé nia parte rejeita ho razaun, hakarak halo viajen iha territóriu ho intensaun atu halo promosaun ba fatin turizmu sira, iha rai laran.
"Iha fulan Maiu, Junu, Jullu nia laran ha'u halo konferénsia zoom ne'e, lubuk ida no la para i ha'u simu konvite atu kontinua halo konferénsia internasionál, iha fulan ida ne'e, maibé ha'u dehan lae, fulan Agostu ha'u hakarak pasiar ba mai, iha ha'u nia rai para halo promosaun oitoan ba turizmu nasionál",
"Úniku ne'ebé ha'u atu halo, iha dia 8 Agostu, Sábadu halo intervista ida ho televizaun Índia nian, ha'u hala'o ho sira seluk, hahú kedas iha primeira semana, fulan Setembru, iha ona konferénsia zoom rua, ho Japaun no Cambera, sira marka tiha ona",
"Iha fulan Agostu ha'u hakarak pasiar duni, maibé aproveita atu halo promosaun turizmu tanba, timor-oan lubuk ida, ba Indonézia gasta osan, favor rai ita nian ne'e, bonitu furak no kapaas loos, tanbá ne'e, ho kareta ou motor ba pasiar, para husik netik osan oitoan ba ema ne'ebé fa'an modo, aifuan, otél no restaurante timor-oan nian, ne'ebé iha Munisípiu no Postu-Administrativu sira ne'e, tanba ba Bali gasta Mil, di'ak liu fahe ba populasaun ne'ebé iha restaurante",
"Tanba ne'e la iha liu intensaun polítika, tanba fatin ne'ebé ha'u ba ne'e, ema balun la hatene",
Bainhira husu kona-bá asina petisaun ne'ebé organiza husi grupu Ângela Freitas nian, hasoru Prezidente Repúblika, Francisco Guterres Lú-Olo, Ramos Horta hatete, nia parte seidauk lee no asina petisaun refere .
"Agora ha'u seidauk asina petisaun, primeiru ha'u seidauk lee tan, ha'u ba ko'alia ho ema sira, iha foho la kompriende saida mak petisaun, tanba ne'e, ha'u nia planu iha fulan Agostu ne'e, atu halo viajem ne'e, ba pasiar la'os ba fa'an fali petisaun ne'ebé ema maioria seidauk hatene tan."
Eis Prezidente da Republika ne'e mos rezeita informasaun ne'ebe dehan ninia parte hala'o vizita ba munisipiu atu ajuda mobiliza populasaun atu asina petisaun.