Horta Seidauk Asina Petisaun husi Angela

Dr. Jose Ramos Horta ne'ebe halo viajen haleu municipi promove area turizmu Timor Leste iha Tutuala Dr. Jose Ramos Horta ne'ebe halo viajen haleu municipi promove area turizmu Timor Leste iha Tutuala Foto Dok Jose Ramos Horta

Tempotimor (Dili)-Laureadu Nobel da Pas José Ramos Horta deklara, to’o ohin loron nia seidauk asina petisaun husi grupu Rezistensia Nasionál Defende Justisa no Konstituisaun RDTL (RNDJ-KRDTL), tanba petisaun ne’e rasik nia seidauk lee.

Horta dehan, maske molok ne’e nia ba hasoru-malu ona ho ekipa RNDJ-KRDTL, maibé nia foin simu dokumentus petisaun iha Kuarta (05/08) kalan, no to’o ohin nia seidauk konsege lee dokumentus refere.

“Mezmu ke ha’u lee i ha’u konkorda sira-nia argumentu, la signifika ha’u sei asina,” dehan Horta iha nia rezidensia, Metiaut, Kinta (06/08).

Horta esplika, nia la hatene aktus PR Lu Olo ne’ebé ema hatete illegal, ilejitimu ka inkonstitusional ne’e loos duni ka lae.

Tanba, nia hatutan, iha interpretasaun juridiku oioin, katak Prezidente Repúblika iha kompetensia ka laiha kompetensia tuir konstituisaun ne’e depende ona idaidak nia interpretasaun.

“Ita koalia ho konstitusionalista balun sira hatete ‘lae, prezidente labele halo nune’e’, konstitusionalista seluk hatete ‘lae, nia bele’,” dehan nia.

Horta dehan tan, maske PR Lu Olo halo sala karik, nia la hatene ida ne’e bele sai materia ne’ebé sufisiente atu ezije PR ninia demisaun ka lae.

“Klaru, ema barak bele halo, nu’udar sidadaun. Mais, ha’u nu’udar eis Xefe Estadu ida, sidadaun ida ho kakutak uitoan, ha’u sei lee lai sira-nia dokumentus, mais atu asina ho sira, ne’e ha’u sei hanoin dala 10 tan,” deklara Horta.

Maske nia simu ona petisaun ne’e no iha sei lee petisaun refere, maibé nia la garante katak nia sei asina petisaun refere.

"To'o agora ha’u seidauk asina buat ida, ha’u haree iha jornal balun hatete ha’u asina ona. Petisaun ne'e ha’u seidauk lee, orsida hanesan ne'e hau lee ona, maibé hau la garante atu asina. Tanba, primeiru, ha’u respeita Xefe Estadu Francisco Guterres Lu Olo, maske buat balun ne'ebé nia halo desizaun ha’u la konkorda, maibé ne'e normal," dehan Nia

Rate this item
(1 Vote)
Last modified on Monday, 10 August 2020 18:45
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.