CNRT Konsidera Prezidente PN “Nakdedar” Autoriza PR Deklara EE Dahaat

Parlamentu Nasional Timor Leste Parlamentu Nasional Timor Leste Foto File

Tempotimor (Dili)-Bankada CNRT iha Parlamentu Nasionál (PN) konsidera Prezidente Parlamentu Nasionál Aniceto Longuinhos Guterres Lopes komete aktu illegal, tanba maske governu la marka prezensa iha plenaria extra-ordinaria ba pedidu Prezidente Repúblika ba Estadu Emerjensia dahaat, maibé obriga realiza hodi autoriza PR Lu Olo dekreta EE.

Deputadu CNRT, Gabriel Soares hatete, bankada CNRT husu atu ajenda debate extra-ordinaria ne’ebé lansa iha Kuarta (05/08) muda ba Kinta (06/8) ka kleur liu iha Sesta (07/08) atu Primeiru Ministru (PM) Taur Matan Ruak no membru governu sira bele marka prezensa hodi esplika motivu no medida adekuadu ne’ebé governu tenke halo hasoru Covid-19 iha EE dahaat.

Maibé, nia dehan, Prezidente PN Aniceto la konsidera ezijensia ne'e, nune'e meza PN konsientemente halo manipulasaun ba ajenda plenária extra-ordináriu hodi aprova deliberasun EE, inklui mensajen husi Prezidente Repúblika, sein hetan prezensa husi governu.

“Horseik, Kuarta, Prezidente Parlamentu Nasional ilegal no inkonstitusionál komete tan irregulariedade klara no grave hasoru estadu direiru demokrátiku,” deklara Gabriel, Kinta (06/08).

Tanba ida ne’e, Gabriel dehan, Bankada CNRT deside hodi sai husi plenaria.

"Bankada CNRT foti pozisaun sai husi plenária “walk-out”, tanba PPN ilegalmente admite no hakat liu ona prosedimentu normál no rejimentais bainhira halo prosesu lejislativu espesiál sira, kona-ba deklarasaun eatadu de sítiu no estadu emerjénsia," katak nia.

Gabriel hatete, tuir Rejimentu PN artigu 119 pontu 2, atu debate no halo deliberasaun hodi fó autorizasaun ba EE tenke iha prezensa Primeiru Ministru nian.

“Bainhira governu la marka prezensa iha debate no votasaun ba EE, deputadu sira sei la esklaresidu ba médida implementasaun ne'ebé mak governu atu foti no oinsá manutensaun ba fasilidades kuarentena inklui izolamentu, no kustu ne’ebé tenke hasai, oinsá atu asegura movimentu tama-sai iha fronteira, aeroportu, no seluk tán.”

Iha Rezimentu PN artigu 71 hatete mós katak, votasaun ba kazu EE, tenke tenke votasaun nominál, signifika kada deputadu deklara ninia votu verbalmente.

“Maibé, votasaun ba autorizasaun EE ida horseik ne'e ho votasaun ordinária (tuir artigu 70). Entaun diferensia ho esperiénsia ba norma sira tuir lei iha tempu hirak Iiu ba,” dehan Gabriel.

Aktu hirak ne’e, deputadu CNRT ne’e dehan, hatudu momoos katak Prezidente PN nia lideransa ilegál no inskonstitusionál ne'ebé laiha Iiu memoria instituisionál no mukit koñesimentu ba Rezimentu PN, tanba só Rezimentu PN mak únika dalan atu guia prosesu tomak iha PN.

Maske la konkorda ho desizaun ne’ebé foti ona, maibé bankada CNRT kontinua ho fuan boot hodi fó hanoin ba governu atu haree didi'ak sistema saúde públiku nian.

"Ami mós husu ba  governu defaktu atu uza lei Sistema Saúde hodi halo vizilánsia epidemiolójika no sanitária, halo vijilánsia ba mobilidade. Ba ema estranjéiru bele uza de'it lei migrasaun no ajílu, no Ia presiza aplika tan EE hodi fó risku ba ita-nia povu nia moris no estraga ekonomia rai laran," Gabriel afirma.

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.