Prezidente Autoridade RAEOA ne’e dehan, hamutuk ho nia ekipa halo esforsu tomak atu servi povu Oekusse no sei la haree ba grupu ka partidu.
"Ami hotu-hotu serbisu maka’ss ba Oekusse ka intrese ba Oekusse no nasional maka’as liu, entaun ha’u informa ba Primeiru Ministru katak, ami kontaktu ba ema ka grupu ou partidu hotu-hotu no see de'it mak husi Dili, ami prontu atu serbisu ho sira par halo Oekusse fatin seguru ba ema hotu-hotu," dehan Bano hafoin hasoru-malu ho Primeiru Ministru Taur Matan Ruak iha palasiu governu, Sesta (07/08).
Kona-ba objetivu hasoru-malu ho PM Taur, Bano dehan, nia hasoru-malu ho Xefe Governu hodi informa serbisu ne’ebé nia halo ona durante fulan rua.
"Ami mai prinsipalmente mai hasosu Primeiru Ministru no mós kordena ho ministru sira seluk ho entidade sira ne'ebé presiza rejiaun atu halo koordenasaun, no objetivu hasoru Primeiru Ministru atu informa serbisu durante fulan rua, hahú ha’u sai prezidente autoridade ate nomeiasaun ba sekretariu rejional sira," dehan nia.
Iha sorumutu ne’e, nia dehan, nia parte mós informa kona-ba prioridade ne’ebé halo atu asegura Oekusse, prinsipalmente realsiona ho pandemia Covid-19.
Aleinde ne’e, nia hatutan, nia parte mós rona direita informasaun husi PM kona-ba enkudra Oekusse iha planu nasional rekuperasaun ekonomika.