Sente Dook husi Povu, PN Tetu Tau Osan ba Programa Hakbesik Povu

Prezidente Parlamentu Nasional Aniceto Longuinhos Guterres Lopes Prezidente Parlamentu Nasional Aniceto Longuinhos Guterres Lopes Foto File

Tempotimor (Dili)-Deputadu sira iha Parlamentu Nasionál sente katak durante ne’e sira la besik povu, tanba ne’e PN hahú tetu oinsa atu aloka orsamentu hodi apoiu Parlamentu Nasionál atu hakbesik an ba povu.

Iha Sesta (07/08), bazeia ba orientasaun husi Prezidente Parlamentu Nasionál Aniceto Guterres, lider bankada sira halo reuniaun hodi tetu planu asaun PN nian ba tinan 2021.

Sekretaria Jeral PN, Cedelízia Faria dos Santos hatete, bazeia ba orientasaun husi Prezidente PN, lider bankada sira hahú halo reuniaun atu tetu planu asun anual PN ba 2021.

Maske governu ladauk hanoin kona-ba tetu orsamentu fiskal PN ba tinan 2021, maibé liu husi reuniaun ida ne'e PN hakarak haree ona planu serbisu sira ne'ebé atu tama iha planu asaun anual ba 2021 nian.

"Serbisu ne'ebé tama iha planu asun anual nian, liu-liu serbisu papel Parlamentu ne'ebé mak iha papel halo lei sira, ita mós tau ida ne'e hanesan prioridade, tanba agora ita hatene katak lei barak mak sei pendente hela iha PN, no mós fiskalizasuan komisun nian, nune'e ita mós prearasaun hela ba komemorasaun asembleia konstituente nian,” dehan nia iha PN, Sesta (07/08).

Planu seluk, nia dehan, PN hahú hanoin atu oinsa lori parlamentu hakbesik ba povu.

"Ami mós tau planu kona-ba oinsa atu lori parlamentu besik ba povu tanba ita hatene katak durante ne'e parlamentu kuaze dook husi povu, tanba ne'e ita iha planu atu tau mós iha planu importante," katak nia.

Kona-ba estimasaun orsamentu ba planu prioridade PN ba 2021, Sekretaria Jeral ne’e dehan, tuir estimasaun, osan ne’ebé PN presiza hamutuk millaun $16.

“Mais se Parlamentu simu tetu fiskal husi governu, karik iha mudansa, Parlamentu mós prontu kumpre desizaun governu,” dehan nia.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.