Primeiru Ministru, Taur Matan Ruak hatete, Konvensaun Viena ne'ebé taka dalan atu halo teste ba diplomata sira mak governu hili dalan úniku tenke deklara duni Estadu Emerjénsia, para bele halo prevensaun ba surtu Covid-19 iha rai-laran.
"See embaixada sira hanesan ne'e, ita boot sira haruka oinsá mak kontrola situasaun iha rai-laran. Entaun, haree iha seguransa ne'e, dalan mesak mak avansa ba Estadu Emerjénsia, entaun governu deside iha dia 3 Agostu halo pedidu ba Prezidente Repúblika no dia 4 Agostu kazu importadór ida mosu iha ita-nia rai", dehan PM Taur, iha plenária Parlamentu Nasionál, Tersa (11/08).
Iha fatin hanesan, Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno informa, tuir regulamentu Konvensaun Viena, labele obriga duni diplomata sira atu kumpre regra prevensaun Covid-19, tanba sira ho imunidade.
"Konvensaun Viena ne'e hateten, diplomata sira iha imunidade ita labele obriga, kuandu sira tama mai lakohi teste Covid-19 ita labele obriga", nia afirma
Nia esplika, bainhira diplomata sira mak ho voluntariamente hakarak submete ba regra ne'ebé Ministériu Saúde hatuur ona atu halo prevensaun ba Covid-19, entaun bele halo teste, maibé sira mak lakohi ne'e labele obriga. (*)
