Print this page

Aniceto: "Ha'u Sei La Interese Preokupasaun CNRT"

By August 12, 2020 1717

Tempotimor (Dili)- Prezidente Parlamentu Nasional (PPN), Aniceto Guteres deklara, nia Parte sei la interese ba interpretasaun Bankada CNRT nian, ne'ebé kontinua kestiona legalidade, kona-bá deliberasaun autorizasun estadu emerjénsia.

Desizaun ne'e, Prezidente PN desidi, hafoin loke sesaun intervensaun ba deputadu sira, iha debate konfirmasun estadu emerjénsia, liu-husi plenária estraordinária, iha PN.

Maske nia rekoñese, plenária ida ne'e, deputadu bankada CNRT uza direitu, atu kestiona legalidade prosesu ne'ebé autoriza, husi komisaun permanente kona-bá estadu de emerjénsia, maibé meza sei la preokupa ho ezijénsia hirak ne'e.

"Ha'u la interese, tanba primeiru, Média Center, husi partidu CNRT kondena kedas ha'u ho karikatura ida ne'ebé sira hasai, dehan ha'u mak viola konstituisaun, deskulpa pelu termu ha'u mak té tan, iha rejimentu Parlamentu Nasionál," dehan Prezidente Parlamentu Nasional (PPN), Aniceto Guterres, iha debate kona-bá konformasaun estadu emerjénsia, liu-husi plenária estraordinária, iha Parlamentu Nasionál, tersa (11/8).

Aniceto Guterres mos, fó hanoin ba deputadu CNRT karik la satisfeitu (satisfas) ho legalidade, bele lori ba iha tribunal, tanba dalan atu hakotu legalidade ne'e, mak tribunal.

Nia afirma, bainhira bankada CNRT, lakoi rekoñese ka lakoi hakruuk ba soberania tribunal nian, mak CNRT kontinua halo ida ne'e, iha média sosiál ne'e.

Ba kestaun ne'e, deputada CNRT, Carmelita Monis afirma, momentu ne'ebá, bankada CNRT hola pozisaun sai husi plenária, tanba la aseita ho desizaun meza, ne'ebé ho obrigasaun atu halo aprovasaun ba deliberasaun autorizasaun, ba PR hodi deklara estadu emerjénsia.

Nia dehan, lolos ne'e, molok atu halo aprovasaun deliberasun deklarasaun estadu emerjénsia ne'e, tenke marka prezensa husi Primeiru Ministru, atu bele esplika regras, tanba Governu mak ezekuta, la'ós Parlamentu Nasionál mak ezekuta.

Kona-bá PPN husu CNRT atu lori legalidade ba tribunal ne'e, nia hatete, esperiénsia ida ne'e, akontese fila-fila ona, tribunal mos sei foku liu ka sei la halo julgamentu, tanbá konsidera, ida ne'e kestaun polítika.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items