Xefe Governu, Taur Matan Ruak, louva ho Prezidente partidu CNRT, Kay Rala Xanana Gusmão nia jenerozidade, tanba bele apoia Governu, hodi luta hasoru Covid-19.
"Hau iha ne'e, hakarak louva maun Xanana nia jenerozidade tanba, Governu seidauk aprezenta estadu emejénsia, nia mak husu no eziji taka fronteira no Prezidente Repúblika rasik husu estadu emejénsia tenki iha, i ida ne'e, hanesan apoiu ida ba ita hotu, para bele hakbiit liu tan, atu jere situasaun ida ne'e", dehan PM, Taur Matan Ruak, iha plenária, debate aprovasaun estadu emejénsia, iha Parlamentu Nasional, tersa (11/08).
Prezidente Bankada CNRT, Deputadu Duarte Nunes relata, la'os lakohi aplika estadu emejénsia maibé, presiza buka dalan seluk, atu aplika ba situasaun sira, hanesan kalamidade.
"Ami hakarak fó hanoin presiza hamosu lei ida, ba situasaun ida, bainhira estadu emerjénsia ida-nee hotu, ita hotu hatene katak Indonézia, Austrália aumenta la'os iha ita-nia rai laran, maibé ita presiza hametin liu, iha ita-nia fornteira rai, tasi no lalehan. Dalaruma ita la sukat ho ita-nia kapasidade atu kontrola, katak ema hira mak tama nune'e, ita bele kontrola tuir padraun (estandarte) internasionál", Nia dehan
Iha fatin hanesan, deputadu husi bankada Fretilín, Antonino Bianco hatete, Prezidente partidu CNRT, Kay Rala Xanana Gusmão apoia, estadu emejénsia maibé bankada CNRT, iha Parlamentu Nasional, la konkorda EE, ida ne'e halo konfuzaun.
"Prezidente CNRT, maun boot Xanana dehan, tenke implementa estadu emerjénsia, tanba nesesáriu, agora bankada, iha ne'e reprezenta se mak la apoiu, ida ne'e mak halo ha'u "bilan" tiha fali", tenik Nia
Antes ne'e, iha loron 05 fulan Agostu, Prezidente partidu CNRT, Kay Rala Xanana Gusmão sujere ba Governu, atu taka movimentu sidadaun sira, iha fronteira, rai maran ka terestre no aereo ka aeroportu, hodi salva Timor-Leste, husi ameasa Covid-19.
Tuir Nia, Governu presiza fó apoiu másimu, ba Unidade Patrullamentu Fronteira (UPF) no Unidade Polísia Marítima (UPM), hodi halo seguransa másimu, iha fronteira terestre no tasi, atu evita ema ne'ebé halo transaksaun ilegál, hodi lori Covid-19, tama Timor-Leste.
"Ita rona ona, Konsellu Ministru atu estende estadu emejénsia ba dahaat, tanba ne'e, ha'u la'o haleu ona fronteira, hamutuk ho Unidade Patrullamentu Fronteira no mai ho Unidade Polísia Marítima, hodi husu ba imi, liu-liu peskadór no populasaun sira, iha fronteira, atu evita halo atividade transaksaun ilegál, para ita evita Covid-19 tama mai ita-nia rain", dehan Xanana, durante sosializa regra prevensaun Covid-19 no fó apoiu ai-han ba populasaun, Bairro Akrema, Aldeia Waru-Anan, Suku Biqueli, Postu-Administrativu Atauro, Munisípiu Díli.