MS Sei Rezolve Subsídiu Frontline, MF Prontu Aselera

Ministra Saúde (MS) Odete Maria Freitas Belo ko'alia hela ba jornalista sira iha palasiu governu, Ministra Saúde (MS) Odete Maria Freitas Belo ko'alia hela ba jornalista sira iha palasiu governu, Foto file

Tempotimor (Díli)- Ministra Saúde (MS), Odete Maria Freitas Belo deklara, sei buka solusaun, kona-bá subsídiu liña oin (frontline) sira, hanesan pesoál limpeza (cleaner) inklui seguransa husi kompañia sira ne'ebé mak hala'o servisu, iha kuarentena durante implementasun estadu emerjénsia.

Atu rezolve subsídiu ne'e, Odete hatete, agora dadaun, sei hala'o hela diskusaun, hafoin sei halo mos koordenasaun ho Ministériu Finansas, oinsá mak bele buka solusaun, hodi halo pagamentu.

Nia akresenta, tanba iha dekretu lei Governu nian, la ko'alia klaru, kona-bá subsídiu ba pesoal seguransa sira, tanba ne'e, iha tempu besik sei konvoka enkontru ka reuniaun, atu bele rezolve kestaun ne'e.

"Loron hirak liu ba, ami halo diskusaun ho señor Ministru Finansas, atu haree oinsá mak, atu bele selu pesoál sira ne'ebe servisu hanesan pesoál limpeza (Cleaner)," Dehan nia.

"Nune'e mos, ba seguransa ne'ebé mak kontratu ho sira nia kompañia, maske la iha kontratu legál ho Ministériu Saúde, maibé sira mos eziji Ministériu Saúde, atu bele selu subsídiu ida ne'e, só ke la ko'alia klaru, iha lei kona-bá asuntu ida ne'e, entaun Prezidente atu ko'alia fali ho Ministériu Finansas," dehan Ministra Odete, bainhira halo intervensaun, iha debate konfirmasaun votus, ba deklarasaun estadu emerjénsia ne'ebe hala'o, liu husi plenária estraordinária iha PN, tersa (11/8).

Nia dehan, subsídiu liña frente ba pesoál funsionáriu balun, ne'ebé la selu kompletu, ida ne'e, tanba liga ho lista prezensa liga mos ho kategoria ne'ebé aplika, tuir rezolusaun Governu nian.

Maibé tuir nia, pesoál balun ne'ebé iha kategoria loos ona, no iha kategóriu 3, ne'ebé iha diretu ba $.15. sira mos hakarak ba iha $.20 no $.25.

Ne'e duni, prosesu sira ne'e hamutuk, parte MS mos, halo verifikasun no husu justifikasaun molok halo pagamentu.

"Prontu servisu, ida ne'e ami halo tiha ona, no ami hasai tiha ona karta, enkontru, data limite ne'ebé mak ami fó ba sira, atu submete verifikasaun sira ne'e, mak 5 de Agostu, ne'e sira tenke fó hotu ona dokumentu sira, mai para halo prosesu pagamentu,"

Iha fatin hanesan, Ministru Finansa (MF), Fenando Hanjam deklara, husi sira ne'ebé, agora dadaun, hala'o hela prosesu pagamentu subsídiu liña oin (frontline), no tempu badak, sei finaliza prosesu refere.

Nia dehan, funsionáriu balun ne'ebé servisu, iha liña frente, balun simu ona subsídiu, agora balun iha hela prosesu, no balun presiza entrega sira nia rejime legál, foin bele halo pagamentu.

"Maibé, buat hirak ne'e sei iha prosesu hotu nia laran, tempu badak ita sei halo sira nia pagamentu hotu, "dehan nia.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.