Ekipamentu hirak ne'e Governu sosa atraves Fundu Covid hodi halo prevensaun ba moras Coronavirus Disease 2019 (Covid-19) iha Timor-Leste.
Vise-Ministru Saúde, Bonifácio Maucoli dos Reis hateten, fundu Covid-19 ho montante tokon US$5 ne'ebé governu fó husi UNDP hodi hola ekipamentu saúde, inklui ventiladór sira.
"Item 33 mak iha ona Timor-Leste, agora ita hein faze datoluk nian. Ne'ebé, espera iha faze datoluk ne'e ekipamentu sira ne'ebé liuhusi UNDP kompletu ona," dehan nia, ba jornalista sira, iha edifísiu SAMES, Kampung Alor, Kuarta (12/08).
Entretantu, tuir informasaun, ekipamentu husi UNDP iha faze datoluk mai TL ne'e sei to'o iha fulan-Agostu nia rohan.
"Item sira ne'ebé to'o ona iha TL mak ventiladór 10, ai-moruk, medikamentu, ekipamentu protesaun individuál no seluk tan," nia dehan.
Fundu ne'ebé governu TL prevé hodi hola ekipamentu kuarentena no izolamentu nian ne'ebé hola husi UNDP, antes ne'e dehan to'o iha TL fulan-Maiu, maibé realidade fulan-Agostu foin unidade 33 maka tama. (*)