Diretór Ezekutivu AHDMTL, Gaspar Afonso hateten, objetivu importante hosi kongresu ne'e atu lori nia kongresista sira mai husi munisípiu atu bele hatene kona-ba relatóriu anuál durante tinan tolu nia laran saida mak AHDMTL halo ona.

Nia dehan, liuhusi kongresu ne'e bele hatene rezultadu, atinjimentu, dezafiu no obstakulu sira no mós sei halo lansamentu ba planu estratéjia no diskute kona-ba rejimentu interna no estatuta no eleitu konsellu fiskál foun.

"Ita hakarak ita-nia boa governasaun ne-ebé mak di'ak no estratéjia ne'ebé bem feitu, atu tinan lima to'o sanulu mai ita bele atinje saida mak ita hakarak halo ba membru sira iha foho ka munisípiu", hatete nia, ba jornalísta sira, iha Salaun Delata III, Elembloi, Kuarta (12/08).

Nia dehan, durante ne'e, buat ne'ebé asosiasaun halo ona maka fó treinamentu, advokasia, sensíbilizasaun ba komunidade, sosiedade família, autoridade lokál no governante sira oinsá konsidera ema ho difisiénsia matan, liuliu valoriza feto no labarik difisiénsia matan sira.

Nia informa, daudaun ne'e AHDMTL rejista ona ema ho difisiénsia matan hamutuk ema 243, maibé iha sensu 2015 iha AHMDTL rejista ema ho difisiénsia matan hamutuk 14.828, maibé sira-nia fatin sei limitadu, nune'e to'o agora fatin rasik seidauk iha.

Tan ne'e AHMDTL sei koolabora hela ho Embaixada Japaun iha TL atu hetan fundu hodi konstrui sira-nia sentru treinamentu no dormitóriu hodi bele halibur sira iha Tibar.

Nia husu, ba governu atu tau atensaun másimu ba sira, tanba maski antes ne'e PN aprova ona rezolusaun, maibé to'o oras ne'e laiha implementasaun.

Prezidente Bord AHDMTL, Jacinta da Cruz, sente priviléziu boot tanba hetan fiar hodi reprezenta Konsellu Fiskál ba konfiansa tomak ne'ebé membru AHMDTL fó fiar ba sira durante tinan tolu nia laran, husi 2017 to'o 2020.

"Ami mós hakarak kongratula hodi apresia ba parte ezekutivu ne'ebé lidera husi Gaspar Afonso ho nia estrutura tomak ne'ebé durante servisu makaas, no forte tebes hodi koopera hamutuk ho ami parte fiskál hodi asegura, kontrolu no monitoriza lala'ok organizasaun ho nia membru sira", dehan nia.

Nia rekoñese, durante reprezenta hanesan Konsellu Fiskál ba ema ho difisiénsia, iha lakuna oioin no enfrenta preukupasaun, maibé ho vizaun boot sira kontinua hakat husi atinje vizaun no misaun AHDMTL nian husi harii sosiedade ida akontese mudansa atitude, individu, familia, komunidade hasoru ema ho difisiénsia matan sira hotu moris ho independente iha moris ekonómia.

"Sira nia direitu fundamentál sei hetan respeitu no proteje husi estadu, atu promove direitu ema ho difisiensia atu asesu livre, la ho diskriminasaun ba eskola, formal ho naun formal, formasaun empregu bo kontribuisaun iha merkadu laborál, hodi hasa'e konxiénsia públiku kona-ba direitu ema ho difisiénsia matan ho asesibilidade", dehan Jacinta.