Antes atu halo ratifikasaun, Parlamentu Nasional nu'udar orgaun reprezentante povu presiza hetan dokumentu ofisial kona-ba Fronteira Marítima ne'ebé Estadu rai rua ne'e asina ona.

Vise-Prezidente bankada FRETILIN, Deputadu Francisco Miranda Branco hateten, Parlamentu Nasionál tenke asesu ona ba dokumentu tratadu ne’e para bele estuda no entende, nune'e too tempu PN bele halo ratifikasaun.

“Ita-nia konstituisaun RDTL Artigu 70 hateten, tanba ita mak parlamentu, ita mak ratifika entaun ita presiza hetan dokumentu tratadu ida ne’e”, tenik nia, iha Uma Fukun PN, Tersa (26/3).

Nia hatutan, pedidu husi Foreing Investiment Review Board Australia katak, maske fronteira estabelese ona, maibé riku-soin iha tasi laran sei partilla.

Nune'e implika mós ba prosesu sosa asaun partisipasaun iha esplora Greater Sunrise tenke adia tanba husi elementu ne’ebé halo plaka reguladora Austrália husu adiamentu.