Deputada Maria Angelica Rangel hateten, antes atu halo transferensia Governu Austrália ho kompañia sira tenke haree dokumentu sira ne’e legalmente mak sira sei bele halo asina akordu ruma ka ratifika uluk.

"Komisáriu na’in rua husi Timor GAP no Kompañia Australia nian tenke asina akordu no komisáriu sira halo votasaun pasa mak ita foin ba halo transferensia", dehan nia, iha Uma Fukun PN, Tersa (26/3).

Ne'e duni, kriteriu hirak ne'e tuir lei interna Foreing Investiment Review Board Austrália nian tenke hakat liu prosesu ne'e hafoin bele transfere osan.

Hataan ba preokupasaun ne’e, reprezenta Governu, Sekrétariu Estadu Komunikasaun Sosiál, Merício Juvenal dos Reis Akara hateten, prosesu husi Governu Timor-Leste kompletu ona.

“Ita nia planu kompleitu ona, ministra finanasas hala’o ninia knaar ona, banku sentral iha ona koordenasaun ho Timor-GAP, ita prontu ona atu selu”, tenik nia.

Ne'e duni, Timor-Leste la mesak maibé hamutuk ho parseiru Austrália inklui kompañia sira, ne’ebé liga ba lei internal sira-nia kona-ba Foreing Investiment Review Board.

Bainhira konpania australianu sira faan sira-nia asaun, konsellu ida ne’e tenke halo revizaun no husu tempu semana rua atu estuda.

Maski nune'e, la prezudika ba prosesu atu selu no mós partisipasaun TL nian iha kampu mina-matan Greater Sunrise.