Print this page

UNICEF Apoiu Laptop Rua Ba CRC Liuhusi MAPKomS

By August 14, 2020 1659

Tempotimor (Dili) - Liuhusi kooperasaun entre Ministériu Asuntu Parlamentár no Komunikasaun Sosiál (MAPKomS) ho UNICEF, konsege fó doasaun laptop ba Centru Radio Comunidade (CRC).

Ministru Francisco Pereira Jerónimo, agradese tebes bá kooperasaun ho UNICEF hodi ajuda laptop 2 ba MAPKomS hodi suporta servisu Centru Radio Comunidade (CRC).

"Laptop 2 ne'ebé UNICEF fó atu ajuda Radio Metro hodi hala'o knaar di'ak liután, tanba atu hala'o knaar ne'ebé di'ak liu ita presiza materiál sira atu suporta", dehan Ministru, iha gabinete MAPKomS, Sesta (14/8).

Governante ne'e informa, kooperasaun ne'e haree liu iha área komunikasaun nian, ne'ebé halai liubá radio atu fó informasaun loloos kona-ba atividade iha baze.

Iha fatin, Representativa UNICEF TL, Valerie Taton hateten, objetivu husi soru-mutu ne'e atu ajuda Radio Metro FM, atu sira bele halo streaming online hodi promove direitu labarik iha Timor-Leste no mós kona-ba informasaun Covid-19.

"UNICEF apoiu Ministériu Saúde atu bele dezenvolve mensajen oinsá atu prevene Covid-19 no mós materiál hirak ne'ebé bele uza hodi distribui ba populasaun sira atu proteje Covid-19", dehan nia.

Aleinde ne'e, UNICEF mós apoiu Ministeru Edukasaun liuhusi programa sira bolu 'Fila-fali ba eskola' tanba durante pandemia Covid-19 sira hela iha uma. Servisu hirak ne'ebé temi ona UNICEF mós apoiu Ministériu Saúde hodi estabelese hotline atu bele telefone ba hodi husu informasaun kona-ba Covid-19.

"UNICEF mós koopera ho Ministériu Obras Publíka atu estabele fasilidade fase liman iha fatin publik sira hanesan, munisípiu sira iha fronteira, iha merkadu no iha fatin publiku sira atu asegura katak ema bele pratika maneira preventiva ba Covid-19".

UNICEF, hanoin katak importante teb-tebes hodi atu konitnua koopera ho governu, liu-liu husi programa radio hanesan atividade ida hodi divulga ho disemina informasaun ba ema hotu-hotu, tanba UNICEF hanoin katak radio mós hanesan kanal importante atu disemina informasaun tanba radio bele kobre ema barak iha territóriu Timor-Leste tomak. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items