Vise-Prezidente PN hato'o mensajen ne'e hafoin partisia iha komemorasaun Convention on the Elimination of All Forms of Discrimination Against Women (CEDAW) ba dala 18 ne'ebé realiza iha salaun Tower Fatuhada, Tersa (18/8).

Nia apresia tanba ho susesu Simpóziu Nasionál kona-ba CEDAW nafatin fanun feto maluk timoroan hotu atu hakaas-aan servisu oinsa bele avansa igualdade jéneru ba timóroan hotu iha nasaun Timor-Leste.

Nia hatutan,  feto asuwa'in Timor-Leste sira-nia naran ne'ebe boot tebes maka Maria Tapó, Rosa Muqui Bonaparte, Maria Gorrete, Isabel Barreto, inklui sira ne'ebé sira-nia naran haluha ona.

Nia mós husu ba feto maluk sira hotu, atu presiza kumpre buat tolu atu hakat ba oin hodi hadi'ak liután situasaun, katak feto timoroan sira presiza servisu hamutuk ho mane sira, servisu makaas, no mós servisu ho matenek.

"Presiza servisu hamutuk ho mane sira, ho instituisaun oioin, ho Governu, lgreija, no selseluk tan. Maibé, importante liu mak servisu hamutuk ho ita-nia feto maluk sira iha luta naruk ba igualdade jéneru ne'e, maski diferensa oioin ne'ebé ita iha, inklui diferensa polítika," dehan nia. (*)