Jenerál Lere hato'o lia-hirak ne'e iha diskursu komemorasaun loron Forsa Armada Libertasaun Nasionál Timor Leste (FALINTIL) ba dala XL, iha Kuartél Jerál FALINTIL-FDTL, Fatuhada, Dili, Kinta (20/8).
"Veteranu sira iha tempu hirak ne'e aproveita de'it hasoru malu iha kongresu ruma, la hasoru malu ho regulár kria distánsia ba malu, nune'e ema seluk tama iha ita-nia klaran no bele sobu ita-nia unidade, domin no konfiansa ba malu. Atu hasoru malu dehan tempu laiha, maibe hasoru ema seluk atu lorloron hela de'it," dehan Lere.
Eis-gerrileiru hateten, entre veteranu sira presiza rona malu nafatin tanba uluk hamutuk rona malu mak rezulta Timor-Leste hetan liberdade.
Tanba ne'e, Lere nafatin enkoraza ba veteranu sira atu kontinua iha responsabilidade hodi dezenvolve Nasaun.
"Veteranu presiza rona malu nafatin, halo enkontru malu beibeik no regulár tau neon hamutuk haree dalan ne'ebé diak liu, oinsá lori ita-nia povu no nasaun ne'e ba oin, ita lori hamutuk ona ita-nia rai mai independénsia, ita nafatin iha responsabilidade hamutuk atu iha neon ho laran hodi kontribui ba dezenvolvementu ita-nia povu no ita-nia rain," tenik nia. (*)
PUBLISIDADE HUSI MOP FO PARABENS BA LORON FALINTIL