“Promulgasaun Lei Medidas Prevensaun no Kombate Korrupsaun sei hametin liután, fiar públiku nian ba instituisaun sira ne’ebé Estadu harii. Atu nune’e, ba oin, implementasaun Lei ne’e sei hametin fila-fali fiar sidadaun nian ba integridade, transparénsia, efisiénsia, efikásia instituisoins Estadu nian, hodi servi ba interese públiku “ dehan Prezidente Lú Olo iha komunikadu refere.
Iha komunikadu imprensa nee, relembra hikas karta PR nian ba Parlamentu Nasionál, ne’ebé hatete:
“Prevensaun no kombate kontra korrupsaun la’ós de’it liuhusi aprovasaun lejislasaun no montajen sistema ba institusoins ne’ebé nu’udar núkleu sentrál. Importante tebes prevensaun no kombate korrupsaun atu insituisoins funsiona efetivamente, tuir prinsípiu legalidade, izensaun, transparénsia, efisiénsia, efikásia, simplisidade no previsibilidade ba prosedimentus nomós iha partisipasaun husi atores prinsipais, inkui instituisoins profisionais no sidadaun, iha área no prosedimentu ho finalidade atu servi interese públiku.”
Prezidente Repúblika apela ba Governu no Parlamentu Nasionál, atu apoia Komisaun Anti-Korrupsaun, Prokuradória Jerál Repúblika, Polísia Sientífika no Investigasaun Kriminál no Tribunal Rekursu hetan meius nesesáriu, atu kombate korrupsaun ho efetivu, liuhusi atribuisaun Orsamentu Jerál Estadu, hodi permite iha rekursu umanus espesializadas, tékniku no finanseiru sira, atu susesu iha misaun komplexu ida ne’e, iha luta kontra korrupsaun no krime organizadu.
Prezidente Repúblika iha ninia karta ba Parlamentu Nasionál hateten, implementasaun Lei ba Prevensaun no Kombate Korrupsaun, atu iha impaktu efetivu no alargadu, Lei ne’e rasik presiza fali regulamentasaun komplementar, liuhusi Dekretu-Lei no Dekretu sira seluk, liuliu relasiona ho área vulnerável sira, iha verifikasaun korrupsaun no konflitu interese nian.
Antes ne'e, iha loron 20 fulan Jullu tinan 2020 ne'e, Parlamentu Nasionál aprova Lei Medidas Prevensaun no Kombate Korrupsaun ho unanimidade ho votus 61.