Teofilho hato’o kestaun ne’e bainhira sai oradór ba semináriu ho tema Um pais, um povu, uma identidade" ne'ebé organiza husi Fakuldade Siénsia Sosiál UNTL, ba komemorasaun loron Referendu ne’ebé monu iha 30 Agostu.

Teofilho hatete, SEAK iha politika atu konserva partidu Fretilin no CNRT ba muzeu, maibé seidauk bele tama lider sira seidauk hakarak atu husik.

"SEAK nia polítika mós hakarak konserva partidu istóriku sira hanesan Fretilin no CNRT, entaun se ita-nia lider sira mak iha konsinénsia par atu husik ona partidu sira ne'e ba muzeu mak SEAK halo kedas konservasaun ba partidu rua ne'e ba partimóniu estadu no partimóniu istóriku, maibé agora sira uza hela ida ne'e hodi hetan forsa polítika par hetan poder," dehan Teofilho, Tersa (25/08).

Tanba lider sira seidauk iha konsensia, Teofilho dehan, tenke hein lider hirak ne’e mate hotu mak bele konserva partidu rua ne’e iha muzeu.

"Ita sei akompaña lai, fó tempu ba sira  par sira uza lai, mais to'o tempu ida, kuandu lider nasionál sira laiha ona, ita bele prezerva ona partidu rua ne'e hanesan partimóniu estadu iha muzeu, tanba istorikamente prosesu sira ne'e hahú husi partidu rua ne'e mak ita alkansa ita-nia objetivu," dehan nia.

Tan ne’e, nia afirma, governu iha obrigasaun atu konserva.

“Mais ita-nia lider to'o ohin matan sei lakan hela, dehan labele bok, entaun ita mós labele book," nia dehan.

Teofilho mós rekoñese katak, laiha kapasidads atu ko'alia lider nasionál sira, maibé akompaña de'it, kuandu tempu ne'ebé sira laiha ona, jerasaun foun sira foti no tau kedas iha muzeu.