UNICEF Apoiu EPP 100.000 Ba MS

Ministra Saude Timor Leste, Dra. Odete Belo halo hela diskursu iha seremonia entrega ekipamentu protesaun pesoal husi UNICEF (25/8) Ministra Saude Timor Leste, Dra. Odete Belo halo hela diskursu iha seremonia entrega ekipamentu protesaun pesoal husi UNICEF (25/8) Foto Suplai

TempoTimor (Dili) - Fundus Nasoins Unidas ba Labarik (UNICEF sigla inglés) fó tan apoiu Ekipamentu Protesaun Pesoál (PEP), hamutuk 100.000 ba Ministériu Saúde (MS) hodi halo prevensaun ba Coronavirus Disease 2019 (Covid-19), iha Timor-Leste (TL).

Ekipamentu sira ne'e sei uza hodi jere Covid-19 no mós garante profisionál saúde sira iha ekipamentu nesesária atu kontinua fornese servisu saúde ne'ebé esensiál ho rotina.

Ministra Saúde (MS), Odete Viegas Belo hateten, UNICEF apoiu beibeik ona povu TL, no sira nafatin iha kometimentu boot atu servisu hamutuk ho governu liuhusi ministériu hodi hasoru Covid-19, no apoiu ne'ebé sira fó hodi bele garante esensiál la'ós de'it ho kualidade aas, maibé oinsá ajuda no fasilita médiku sira hodi halo atendimentu ho di'ak.

"Ekipamentu sira ne’e la'ós de'it ba profisionál saúde liña frente sira, maibé ba mós ema sira mak iha asesu ba sentru saúde hodi kuidadu saúde primária ho servisu sira seluk", dehan nia, ba jornalista sira hafoin bainhira halo distribuisaun ekipamentu saúde iha SAMES, Kampung Alor, Tersa (25/8).

Nia husu ba profisionál saúde sira atu utiliza ekipamentu hirak ne'e ho kuidadu no tuir nesesidade, ba sira ne'ebé iha liña bele hetan hotu ekipamentu ne'e, maibé sira ne'ebé halo de'it atendimentu iha sentru saúde sufisiente ba sira bele uza de'it máskara.

Iha fatin hanesan, reprezentante UNICEF iha TL, Valerie Taton hateten, totál ekipamentu protesaun pesoál ne'ebé sira apoiu, hamutuk 100.000-liu, sira ne'e inklui máskara sirúrjika no máskara N95, protetór oin, ókulu asegura oin, luvas sirúrjika no imajinasaun, no vestiáriu servisu nian.

Nia dehan, ekipamentu hirak ne'ebé sira apoiu, sei distribui ba profisionál saúde liña oin sira iha sentru saúde hamutuk 70-resin ne'ebé eziste iha munisípiu 13 iha TL.

"UNICEF kontente tebes tanba bele apoiu Ministériu Saúde hodi hatán ba Covid-19, liuhusi entrega remesa boot ekipamentu protesaun pesoál nian ba profisionál saúde sira hodi ajuda halo atendimentu ba populasaun Timor-Leste", dehan Taton.

Nia hatutan, suprimentu hirak ne'e importante tebes hodi garante kuidadu ba profisionál liña frente sira no ba labarik ho sira-nia família tomak iha fatin hotu hodi asesu beibeik ba servisu saúde ho rotina iha ambiente ne'ebé seguru.

Nia dehan, apoiu hirak ne’e finansia husi Banku Dezenvolvimentu Aziátiku (ABD), GAVI - Aliansa Vasina, Uniaun Europeia, no UNICEF Austrália. (*)

 

HAKARAK HATENE PARTISIPASAUN MAUN BO'OT XANANA GUSMAO IHA KOMBATE COVID 19 LOKE VIDEO IHA KARAIK NE'E.

<iframe width="560" height="315" src="/" frameborder="0" allow="accelerometer; autoplay; encrypted-media; gyroscope; picture-in-picture" allowfullscreen></iframe>

 

Rate this item
(0 votes)
Last modified on Wednesday, 26 August 2020 08:54
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.