Tempotimor (Dili) - Atu realiza asaun pasífiku kontra Prezidente Repúblika, grupu Rezisténsia Nasionál Defende Justisa no K-RDTL ne'ebé lidera husi Ângela Freitas no Ai-Tahan Matak halo kobransa ba povu ki'ik sira.

Portavós grupu Rezisténsia Nasionál Defende Justisa no K-RDTL, Ângela Freitas, rekonese halo kobransa ba povu hodi bele apoiu finansia asaun ne'ebé bele la'o.

"Kona-ba orsamentu hodi apoiu ba manifestasaun ne'e, ami iha ne'e kada ekipa ida-idak hala'o ninia servisu, entaun tuun ba baze hodi rekolla iha povu sira saida mak sira bele no tuir sira nia kbiit", dehan nia, ba jornalista sira liuhusi konferénsia imprensa, iha nia rezidénsia Formoza, Dili, Kuarta (26/08).

Ângela dehan, kontribuisaun ne'ebé sidadaun sira fó ekipa RNDJ-KRDTL rekolla hotu ona.

"Kualkér kontribuisaun ami simu no ami mós la'o tuir ami-nia kbiit, ne'ebé osan hira mak kada sidadaun sira fó ami labele ko'alia sai, tanba ko'alia kona-ba rezisténsia ne'e ema hotu hatene tanba ne'e estraga nasaun," tenik nia.

Ângela dehan, ema ne'ebé sei partisipa iha asaun pasífika ne'e liu rihun 200, ne'ebé mai husi munisípiu 12 inklui Rejiaun Administrativu Espesiál Oekusi-Ambenu (RAEOA).

Tuir planu, grupu Rezisténsia Nasionál Defende Justisa no K-RDTL sei realiza ninia asaun iha loron 4 Setembru 2020. Fatin ne'ebé indikadu ona maka Tasi-Tolu no Bekora.  

HAKARAK HATENE PARTISIPASAUN MAUN BO'OT XANANA GUSMAO IHA KOMBATE COVID 19 LOKE VIDEO IHA KARAIK NE'E.

<iframe width="560" height="315" src="https://www.youtube.com/embed/0uXuwzjCkMk" frameborder="0" allow="accelerometer; autoplay; encrypted-media; gyroscope; picture-in-picture" allowfullscreen></iframe>