Planu ne’ebé diskute ona, kada ema ida sei hetan direitu hahán ho valór US$ 25. Valór uma kain ne’ebé sei simu bazeia ba númeru membru família sira.

“Oinsá atu buka sosa hahán sira ne'ebé fa'an iha merkadu nasionál, nune'e bele distribui fali ba ema ida-idak hetan hahán tuir osan ne'ebé atribui, atu nune'e pelumenus iha fulan-Novembru ho Dezembru sira iha ai-han para bele konsumu", dehan Ministru Koordenadór Asuntu Ekonomia, Joaquim Amaral, hafoin remata enkontru ho Vise-Primeira Ministra no MSSI, iha Kaikoli, Tersa (01/09).

Nia hatete, subsídiu ne'ebé governu liuhusi MKAE sei fó ba ema hotu-hotu kada ema simu US$ 25, maibé sé iha família ida maka iha membru família hamutuk lima, maka sira hotu sei hetan ba fulan ida nian de'it.

"Nia valór ne'e to'o másimu US$ 25 ba ema ida, maibé se família na’in lima 5 vezes US$ 25,” tenik nia.

Programa ne’e nu’udar parte ida husi polítika V governu nian kona-ba rekuperasaun ekonomia iha rai-laran durante enfrenta situasaun pandemia Covid-19.

Programa fahe hahán gratuita ne’e nu’udar medida rekuperasaun atu bele ajuda produtór ho agrikultór sira atu bele badinas halo to'os tanba merkadu iha kompradór, ho ida ne'e maka iha situasaun ne’e programa rekuperasaun sei sosa hahán sira ne'ebé tama ona iha lista fa'an iha merkadu lokál ka nasionál atu bele ajuda komersiante sira ne'ebé fa'an ai-han.

Maski nune'e, kona-ba lista ba komersiante ne'ebé fa'an nia produtu atu governu bele sosa, nia dehan, MKAE sei halo hela koordenasaun ho ministériu sira, inklui ministériu saúde para haree nia kompozisaun iha respeitu ba nutriente ba kaloria husi lista sira ne'ebé iha.

Entretantu, polítika seluk ba rekuperasaun ekonomia maka oinsá ajuda setór informál sira bele rejista iha sistema seguransa sosiál, no seluk maka ajuda ba sira ne'ebé retensaun ka sira-nia obrigasaun iha sistema seguransa nian ne'ebé governu sei ajuda selu parte balun 6% husi valór 10% ne'ebé iha. (*)