"Ha'u hanoin iha regra EE ne'e obrigasaun governu atu kontinua aplika kuarentena ba sidadaun sira," dehan Sekretáriu Estadu Komunikasaun Sosiál (SEKOMS), Mericio Akara iha Parlamentu Nasionál, Kuarta (2/9).
Nia afirma, difikuldade balun ne'ebé antes ne'e hasoru iha Estadu Emerjénsia fulan hirak liubá, maka governu iha obrigasaun atu hadi'a no haree oinsá labele akontese tan.
Nia dehan, hanesan ezijénsia ne'ebé deputadu sira levanta kona-ba sidadaun timoroan sira ne'ebé konsentra fali iha Atambua tanba la konsege tama mai ne'e governu mos haree hodi rezolve.
"Prosesu ida ne'e iha ona tékniku sira nia liman, tan ne’e tempu badak governu sei haree," dehan nia.
Molok ne'e, deputada Bankada FRETILIN, Marito Mota, husu ba governu atu bele buka solusaun oras loke fronteira atu timoroan sira bele tama mai no labele ‘bou’ hamutuk iha kuarentena Atambua nian.
"Se bele governu koordena ho ministériu sira atu bele haree tok kestaun ne'e, no diak liu aumenta tan tempu atu timoroan sira bele tama mai," dehan nia. (*)
