Hanesan públiku hatene, molok nee lider Unijma Pro RDTL Antonio Aitahan Matak ativu tebes hodi fó apoiu no reprezenta grupu RNDJ-KRDTL hodi halo koordenasaun ho Polisia Nasional Timor-Leste (PNTL) atu halo manifestasaun kontra PR Lú Olo.

Maibé, Portavoz Orgaun Diretiva Sentral (Ordic) CPD-RDTL no Unijma Pro RDTL José Teki-Liras hatete, Unijma Pro RDTL la hola parte iha grupu Angela Freitas.

"Fretilin nia organizasaun, CPD-RDTL ka Fretilin Movimentu no Unijma Ativista PRO-RDTL, la halo parte iha manifestasaun ne'ebé grupu RNDJ-KRDTL sei hala'o iha loron 4 Setembru aban, ne'ebé adi'a ba tempu seluk," dehan portavoz Ordic iha Manleuana, Kinta (03/09).

Ho nunee, Teki-Liras husu ba parte seguransa atu halo kapturasaun ba individu balun neebé uza atributu CPD-RDTL no Unijma hodi envole iha manifestasaun.

"Fó hatene ba komandu F-FDTL no PNTL ho públiku tomak katak, ema ruma ka grupu balun mak lori organizasaun nia atributu hanesan bandeira Frente no bandeira OPTT ka emblema estandarte serbisu nian, di'ak liu prende no investiga ema sira nee, tanba laiha autorizasaun husi diresaun," dehan nia.

Portavoz ne'e mós apela ba membru hotu iha teritóriu nasionál atu hakmatek iha fatin no labele hakat liu orientasaun no prinsipiu organizasaun nian.

"Husu ba organizasaun nia kuadru, dirijente sira, militantes, responsavél massa populár wa'in atu hakmatek ho vizilánsia popular forte iha ida-idak nia sentru no labele hakat liu organizasaun nia orientasaun no prinisípiu hodi kahur tun-sa'e," Teki-Liras afirma.