Xanana prefere atu ponte ne’e hanaran Don Martinho Lopes, eis-Bispu Dioseze Dili nia naran.

Maski nune’e, Primeiru Ministru, Taur Matak Ruak hakarak mantein nafatin ho desizaun anteriór hodi fó naran Nelson Mandela, eis-Prezidente Áfrika Súl.

Taur hatete, desizaun atu tau naran Nelson Mandela ba ponte Laleia ne'e deside ona husi Konsellu Ministru, nune'e atu tau fali seluk nia naran, parte governu laiha hanoin.

"Maun boot Xanana prefere atu hanaran ponte Laleia ho Don Martinho Lopes oinsá governu nia haree? Desizaun Konsellu Ministru halo tiha ona, ha'u seidauk iha ideia atu adianta ba ida ne'e", dehan nia, hafoin remata soru-mutu, iha edifísiu Ministériu Interiór, Vila-Verde, Sesta (04/09).

Ponte Laleia atu hanaran Nelson Mandela ne'e rekomenda husi Premiadu Nobel da Paz, José Ramos Horta ho razaun, tanba antes ne'e eis-Prezidente Áfrika Súl, Nelson Mandela fó mós ninia kontribuisaun hanesan sai ponte ba diálogu mundu tomak relasiona ho problema Timor-Leste.

"Ha'u hakarak tau nia naran iha ponte tanba nia ema ida ne'ebé koñesidu nu'udar ponte halo diálogu ho mundu tomak. Nia ema ida konstrutór ponte diálogu ho mundu tomak" dehan Horta.

Antes ne'e, iha loron 31 Agostu 2020, eis-Primeiru Ministru, Kay Rala Xanana Gusmão, prefere atu hanaran ponte Laleia Don Martinho Lopes, tanba ho razaun Bispu Don Martinho Lopes mós fó ninia kontribuisaun boot ba independénsia Timor-leste nian.

"Ha'u triste tebes, ha'u rona katak sira (Governu) fó naran ponte Nelson Mandela, sente triste tebes, tanba Laleia oan ida, Bispu Don Martinho Lopes, iha papél boot ida halo negosiasaun ho Indonézia to'o konsulta populár 30 Agostu 1999", dehan Xanana.

Maski ho diferente ideia entre premiadu Nobel da Paz José Ramos Horta ho Xanana Gusmão ba naran ponte Laleia, maibé governu mantein ho hanaran ponte ne’e ho Nelson Mandela, tanba aprova ona iha Konsellu Ministru. (*)